YES THE BEST 911 BORACAY

Friday, June 29, 2012

Koreano sa Boracay, ninakawan habang natutulog; suspek, kalaboso!


Ni Malbert Dalida, News Director, YES FM Boracay

Mag-ingat sa sobrang pag-inom ng alak. Dahil baka sa sobrang kalasingan, ika’y manakawan.

Ito ang sinapit ng bente nuebe anyos na Korean national, matapos manakawan noong madaling araw ng Hunyo 27 taong kasalukuyan, sa boat station 2 Balabag, Boracay.

Nabatid sa police report ng Boracay PNP, na isang lalaki ang napansin ng mga pumapatrolyang pulis doon ang nakatulog na sa dalampasigan at walang kasama.

Dahil sa mga insidente ng mga nakawan sa isla, minarapat umano ng mga ito na gisingin ang biktima, subali’t hindi ito nagising sa paniniwalang labis ang kalasingan ito.

Minarapat din umano ng mga ito na bantayan saglit ang naturang turista, hangga’t napansin ng mga ito ang isang lalaking lumapit at animo’y ginigising ang biktima.

Sa di kalayuan nama’y nasaksihan umano ng mga nagbabantay na pulis na tila ninanakawan na ng suspek ang Koreano at nagtangkang lumayo.

Kaagad hinuli ng mga pulis ang suspek na nakilalang si Efren Garcia y dela Cruz,ng Bakhaw, Jaro, Iloilo.

Narekober mula rito ang mga umano’y nakaw na gamit sa suspek kasama pa ang mahigit dalawang libong pisong pera ng biktima, at iba pang cellphone na pinaniniwalaang hindi naman pag-aari ng suspek.

Laking pasalamat ng nahimasmasang biktima nang maisuli ang mga ninakaw sa kanya, habang inamin naman ng suspek ang krimeng nagawa.

SP Session, binalot ng tensiyon!


Ni Edzel Mainit, Field Reporter, YES FM Boracay

Napuno ng tensiyon ang sesyon ng Sangguniang Panlalawigan (SP) ng Aklan sa Provincial Capitol nitong nagdaang Miyerkules, Hunyo 27, taong kasalukuyan.

Ito ay makaraang nagkaroon ng mainit na diskusyon sa pagitan nina SP Member Rodson Mayor at Vice Governor at Presiding Officer Gabriellie Calizo-Quimpo kaugnay sa urgent request ni Aklan Governor Carlito Marquez na nanghihingi ng pag-endorso ng Sangguniang Panlalawigan.

Ang nais ni Mayor ay madaliin ito batay sa kahilingan ng gobernador.

Bagamat sang-ayon naman si Calizo-Quimpo sa nasabing panukala, hindi naman nito gustong madaliin at agad na aprubahan ng ganun-ganon na lang na hindi man lang ito dadaanan sa masinsinang pang-uusisa ng SP.

Paliwanag ng Bise Gobernador, kailangan pang ihanda ang mga polisiya kaugnay sa panukalang ito, dahil ayaw niya na mai-kumpromiso ang Internal Revenue Allotment (IRA) ng buong probinsiya para lamang sa hindi nabusising transaksiyon na papasukin ng Aklan.

Kaya napag-pasyahan ng presiding officer na mag-imbita ng mga resource persons, at doon nagsimula ang hindi magandang palitan ng mga salita sa pagitan ng dalawang mambabatas ng Aklan.

Mula sa ganoong eksena habang nasa sesyon ay kinuha ni Mayor ang kaniyang office table name plate na gawa sa marmol na nilimagan ng kanyang pangalan at ihinampas ito sa mesa, at sinundan pa ito ng makalas na boses na nasa tonong argumento.

Ikinagulat naman ng lahat ng mga Board Members ang mga ginawa ni Mayor, gayon din ng mga miyembro ng media na nagko-cover sa sesyon.

Upang mapahupa ang tensiyon, humingi ng ayuda mula sa mga security guard at umiwas na lamang ang Presiding Officer kay Mayor upang makaiwas na din sa mainit na argument.

Kung maaalala, hindi ito ang unang pagkakataong nagsagutan ang dalawang nabanggit na opisyal ng probinsiya sa loob ng session hall dahil sa mga maiinit na usapin.

Aklan Pulis: Huwag dungisan ang pangalan ng PNP! --- PD Defensor


Ni Edzel Mainit, Field Reporter, YES FM Boracay

Kinumpirma ni Police Senior Supt. Cornelio Defensor, Provincial Director ng Aklan Police, na natimbog nga sa isinagawang follow up at buy bust operation ang isang miyembro ng Aklan Pulis na si PO2 Edcel Tan at hawak na rin ngayon ng mga otoridad.

Ayon sa hepe ng kapulisan sa Aklan, kagabi agad ay isinailalim sa drug test si Tan, pero sa ngayon ay wala pang resulta ang pag-susuri dito.

Sa kasalukuyan ay inihahanda na rin umano nila ang kasong kriminal at administratibo laban sa suspek.

Nabatid din mula dito na may mga kaparehong ulat na din laban sa nasabing pulis, bagay na inuusisa na rin umano nila ngayon matapos ang pagkaka-aresto dito.

Para kay Defensor, ang pagkakatimbog kay Tan ay isang “welcome development” sa bahagi ng otoridad sa kampaniya nilang linisin ang mga masasamang elemento sa kanilang hanay.

Kaugnay nito, nagpaalala si Defensor sa mga pulis sa Aklan na huwag dungisan ang pangalan ng kapulisan.

Umaasa din umano ito na si Tan lang ang may ganitong gawain at wala nang iba pa.

Samantala, kapag napatunayan umano ayon sa Provincial Director na magpositibo sa gawaing ito ang naturang pulis, dadaan ito sa proseso at maaaring matangal sa serbisyo.

Ito rin umano ang kauna-unahang kaso sa Aklan kung saan ang isang pulis ay natimbog sa pagtutulak ng droga simula nang maupo ito sa pagiging PD ng Aklan Police. 

Pulis sa Aklan, huli sa pagtutulak ng droga!


Ni Edzel Mainit, Field Reporter, YES FM Boracay

Natutuwa na sana ang Aklan Pulis dahil naging positibo at matagumpay ang isinagawang buy bust operation ng Provincial Intelligence Investigation Branch (PIIB) at Kalibo Police laban sa isang babaeng tulak droga na kinilala bilang si Ethel Ann Pabiosa ng Balintawak, Escalante, Negros Occidental kahapon ng alas-5 ng hapon sa bayan ng Kalibo.

Subalit hindi akalain ng otoridad na sa gagawin nilang follow up operation ay kapwa pulis din pala ang kanilang madadatnan nang tukuyon ito ni Pabiosa na ka-text dnito at diumano ay isa din sa mga dealer ng pinaghihinalaang shabu.

Ito ay matapos makuha mula sa bulsa ng pinaghihinalaang suspek ang isang sachet ng suspected shabu pati na rin ang marked money sa isinagawang operasyon sa isang bus terminal kagabi matapos na magkasundo ang mga ito na doon magkikita.

Nagbigay ng daan upang mahulog sa kamay ng awtoridad ang pulis na kinilalang si PO2 Edcel Tan, tubong Iloilo, at naka-duty sa Aklan Provincial Public Safety Management Company (APPSMC), ang kanyang cell phone na nakuha mula sa unang nahuling suspek na si Pabiosa.

Napag-alaman ding si Tan ay may isang buwan pa lamang sa APPSMC mula Alatvas Police Station, pero bago ito ma-assign sa Aklan ay doon din ito nagmula sa siyudad ng Iloilo. 

DTI-Aklan, nagbabala sa paniningil ng surcharges sa credit card holder


Ni Edzel Mainit, Field Reporter, YES FM Boracay

Nagbabala ang Department of Trade and Industry (DTI) – Aklan sa mga bangko na naniningil ng surcharges sa mga credit card holder sa probinsiya at sa Boracay na iwasan na ang gawaing ito.

Ayon kay Dina Ruiz ng DTI-Aklan, ang pagpatong ng surcharges sa bawat item na nabibili ng mga cardholder ay mahigpit na ipinagbabawal dahil mado-doble na umano ang singil ng charges.

At kapag hindi nila ito nabayaran sa takdang oras ay sinisingil din ang mga ito ng interest.

Ang pahayag na ito ni Ruiz ay may kaugnayan sa ilang mga establishemento na hindi umano alam ang katulad na batas, at may ibang mga center-facilitated credit card na ipinapasa sa consumer ang surcharges.

Ipinaabot din ni Ruiz na handa na ang DTI na tumanggap ng anumang reklamo na may kaugnayan sa katulad na problema.  

Wednesday, June 27, 2012

SB Malay, dismayado sa Coral Restoration ng DOST sa Boracay


Ni Edzel Mainit, Field Reporter, YES FM Boracay

Laking pasasalamat na sana ng lokal ng pamahalaan ng Malay dahil sa ang Boracay ang magiging benepisyaryo ng proyektong ng Department of Science and Technology (DOST) na “Filipinnovation of Coral Restoration” na gagawin sa isla.

Subalit hindi nila akalaing sa bandang huli ng paglalatag sa programang ito ay maaaring maapektuhan din pala ang ilang ordinansang ipinapatupad sa Boracay.

Ito ay makaraang aminin mismo ng grupo ng DOST na nagpresenta ng nasabing programa na pinangunahan ni Cesario Pagdilao na kapag naging natagumpay ang proyektong ito, sila na ang magrerekomenda sa mga bagay o gawain na posibleng ipagbawal sa naturang lugar na sakop ng programang ito upang mapanagalagaan ang mga korales.

Sa nasabing pahayag ay tila nadismaya ang konseho dahil bakit umano hindi agad naiisip ng DOST na maaaring magkaroon ito ng gusot sa ordinansa kaugnay sa operasyon ng seaport activities tulad ng helmet diving dahil ipagbabawal na dati nilang area.

Gayon pa man, hindi nagsara ng pinto ang konseho kaugnay sa nabanggit na topiko, dahil maaari naman umanong talakayin ito sa gagawing committee hearing.

Pagiging “gun-free” ng Boracay, mahirap gawin --- Provincial Director, Aklan PNP


Ni Edzel Mainit, Field Reporter, YES FM Boracay

Target ng Kapulisan sa Aklan na gawing “gun-free” ang Boracay dahil sa Tourist area ito, pero tila mahirap gawin.

Ayon kay Police Senior Superintendent Cornelio Defensor, Provincial Director ng Aklan Police Provincial Office (APPO), hangga’t hindi pa nare-refill ang batas kaugnay sa pagdadala at pag-iingat ng baril na ma-exempt ang Boracay lalo na kung lisensiyado at pag-aari ito ng security agency, hindi rin aniya mabawalan ang sinumang magdala ng baril papasok ng Boracay sa kabila ng kampaniya ng awtoridad na maging gun free ang isla.

Dagdag pa nito, hangga’t patuloy pa rin ang pagbibigay ng lisensiya at permit to carry ay hindi umano maaaring ipagbawal ang pagdadala at papasok ng isla.

Gayon pa man, sinabi ng Provincial Director na ginagawa pa rin nila ang lahat upang maging “gun-free” ang tourism area na ito.

Ang pahayag na ito ay sinabi ni Defensor sa panayam nitong umaga, kasunod ng sunod-sunod na kasong naitala dito sa Boracay gaya ng indiscrinate firing nitong nakalipas na linggo, reklamo sa ligaw na bala at pangha-harass ng security guard sa kapwa guardiya gamit ang baril.

DOST, target ang coral restoration sa Boracay


Ni Edzel Mainit, Field Reporter, YES FM Boracay

“Coral restoration” ang pakay ngayon ng Department of Science and Technology (DOST) sa Boracay.

Kaugnay nito, inaasahang magtatagal ang taga-DOST sa isla ng isang taong para sa programang dala nila na tinatawag na “Filipinnoviation on Coral Restoration Program”.

Nabatid na ang pamahalaang nasyonal ang nagbigay ng pondo sa mga ito para isagawa ang programang ito sa Boracay bilang isa sa Pilot Technology Demonstration o model para sa promosyon ng Science-based coral reef management.   

Layunin umano nila na mabigyang solusyon ang problema sa pagkasira ng mga korales, para mas mapatatag ang turismo ng isla sa tulong ng atraksiyon ng mga under water activities at para sa kabuhayan ng mamamayan dito.

Ang programa umanong ito ay suportado nina Sen. Loren Legarda, Aklan Congressman Florencio Joeben Miraflores, Governor Carlito Marquez at ilan pang miyembro ng kongreso at senado.

Samantala, kaagapay naman nila dito sa Boracay ang Sangkalikasan Cooperative at Boracay Association of Scuba-diving Schools (BASS) mula sa pribadong sektor.

Trabaho at kita naman umano ang benipisyo nitong madadala sa mga taga Boracay kapag naging matagumpay ang proyekto.

Ang programang ito ng DOST sa pangunguna ni Cesario Pagdilao ay inilatag nila sa Sangguniang Bayan sesyon kahapon. 

Tuesday, June 26, 2012

Tambisaan Port, masikip!


Ni Edzel Mainit, Senior Field Reporter, YES FM Boracay

Kulang ang espasyo sa Tambisaan Port.

Ito ang tinuran ni Sangguniang Bayan Member Wilbec Gelito kaugnay sa obserbasyon nito sa pantalan ng Tambisaan partikular sa daungan ng bangka pati na rin sa parking space ng mga sasakyan.

Aniya, napansin nito na walang kaukulang loading at unloading area sa lugar na ito kaya nagsisiksikan at tila walang diresksiyon ang mga sasakyan pati na din ang mga bangka doon kaya kahit saan ay sumisinggit na lang.

Maliban dito, nakita din aniya nito na wala din halos miyembro ng Malay Auxiliary Police (MAP) sa naturang lugar upang umalalay sa daloy ng trapiko.

Bunsod nito, nagrekomenda si Gelito na kung maaari ay paunlarin din ang Tambisaan port na ito upang maging kanais-nais din maaayos para sa mga dumadaang turista.

“6-6” na schedule color coding scheme, hiniling na gawing “7-7”


Ni Edzel Mainit, Senior Field Reporter, YES FM Boracay

Hiniling ngayon sa Sangguniang Bayan ng Malay na kung maaari ay palitan ang oras ng Color Coding Scheme sa Boracay.

Ginawa ito ni SB Member Rowen Agguire sa sesyon nitong umaga matapos makita aniya nito at batay sa obserbasyon na kapag alas-sais ng umaga hanggang alas-sais ng gabi ang schedule ng color coding sa mga tricycle, marami na ang bumibiyaheng tricycle pag-dating ng alas-sais ng gabi gayong rush hour pa lang ito kaya masikip pa rin ang kalye.

Bunsod nito, humirit si Agguire na gawin na lang itong alas-siyete ng umaga hanggang alas-siyete ng gabi para mabigyang solusyon ang trapik sa kalye sa oras na alas-sais.

Samantala, muli din nitong isinulong ang pagnanais nito na naipatupad na rin ang number coding sa lahat ng sasakyang pribado sa isla.

Subalit ang mga delivery truck aniya ay hindi na kasama dito dahil posibleng maapektuhan ang komersiyo ng isla at may ordinansa na umano na nagreregulate sa katulad na sasaklayan o mga haulers. 

Monday, June 25, 2012

Pagtawad at pag-hingi ng discount ng mga nahuling lumabag sa batas-kalye ng Boracay, bawal!


Ni Edzel Mainit, Senior Field Reporter, YES FM Boracay

 “Habal-habal na naman?!”

Ito ang inisyal na reaksiyon ni Malay Transportation Officer Cezar Oczon sa panayam dito nitong hapon, kung saan maging ito ay aminado na hindi nila mapigil-pigil ang operasyon ng mga sasakyang ito.

Ayon kay Oczon, ito ay dahil hanggang sa ngayon, kahit pa may moratorium sa pag-issue ng permit to transport sa lahat ng uri ng sasakyan sa Boracay, ay suliranin pa rin sa kasalukuyan ang problema kaugnay sa operasyon o pamamasada gamit ang mga motorsiklo.

Kaya patuloy umano ang ginawa nilang paghuhuli sa mga ito, at sa katunayan ay may mag na-impound na rin silang mga nahuling lumabag sa ordinansa at batas.

Sa panayam din dito nitong hapon, nilinaw ni Oczon na hindi pwede ang tawaran o tumawad ang isang mahuling lumabag sa ordinansa sa miyembro ng Municipal Auxiliary Police (MAP) dahil may fixed na penalidad o multa na nakasaad sa bawat nilabag sa ordinansa.

Dahil nga dito ay hindi umano ito pwedeng tawaran, maliban na lamang sa tinatawag na “human consideration” sa nalabag na ordinansa.

Pero mariin nitong sinabi na ang MAP ay hindi pwedeng magbigay ng discount kung halaga o pera na ang pinag-uusapan.

Dagdag pa nito, sa Treasurer’s Office sa Municipal Action Center umano dapat magbayad ang mga may penalidad at hindi sa MAP. 

Operasyon ng habal-habal sa Boracay, bawal sa batas at imposibleng maging legal!


Ni Edzel Mainit, Senior Field Reporter, YES FM Boracay

Bawat talaga sa isla ng Boracay ma gamitin pamasada ang mga single na motorsiklo para magsilbing pampublikong sasakyan ayon kay Malay Transportation Officer Cezar Oczon. 

Sapagkat aniya, ang operasyon ng mga motorsiklo na ito bilang pampublikong transportasyon ay bawal ayon sa nasayonal na batas at maging sa bayang ito ay may ordinansa din.

Paliwanag nito, ang mga habal-habal o motorsiklong ito ay hindi din pwedeng bigyan ng prangkisa katulad ng sa mga tricycle upang maging legal ang kanilang operasyon.

Kaugnay nito, itinuro ni Oczon ang pagsagot sa katulad na tanong sa Land Transportation Office (LTO) na siyang bihasa umano sa usaping ito.

Ganoon pa man, nilinaw nito na iba naman ang sitwasyon ng habal-habal sa “motorbikes for rent” na legal naman umano, dahil sa ginagamit ito pero hindi naman sa pamamasada.

Samantala, marami naman ngayon ang dumidepensa mula sa mga pasahero sa operasyon ng habal-habal sa Boracay kahit na bawal ito.

Ito ay dahil para sa mga ito ay malaki ang maitutulong sa publiko lalo na sa gabi, dahil sa minsan ay namimili ng pasahero ang tricycle kaya in demand ang mga motorsiklo.

Sinabi ni Oczon na imposibleng mangyari na magiging legal ang operasyon ng habal-habal na ito sa Boracay kahit pa sabihing malaki ang maitutulong ng sasakyang ito sa mga pasahero.