YES THE BEST 911 BORACAY

Saturday, August 11, 2012

High -valued ng gulay sa Aklan, kulang na ang suplay; presyo, inaasahang tataas pa


Ni Edzel Mainit, Field Reporter, YES FM Boracay

Hangga’t patuloy na nararanasan parin ang sama ng panahon sa bansa lalo na sa bahagi ng Hilagang Luzon, aminado ang Provincial Agricultures Office ng Aklan na aasahan ang pagtaas ng presyo ng gulay particular ang mga High Valued Vegetable gaya ng repolyo, cauliflower, patatas at carrots.

Ayon kay Marlyn Caniete, Agriculturist ng Provincial Agriculture’s Office, inaasahan na ang 20% na pagtaas sa presyo sa mga nabanggit na gulay.

Bagamat may taniman ng repolyo sa bayan ng Libacao, sinabi nito na hindi rin kakayaning suplayan ng produkto doon ang kailangan ng buong probinsiya lalo na ang Boracay.

Maliban dito, aminado din si Caniete na kinukulang din sa suplay ng gulay sa buong probinsiya ngayon kasama na ang isla ng Boracay dahil sa wala rin umanong suplay ng gulay na dumarating sa ngayon.

Ito ay dahil nasalanta ang mga pananim ng labis na pag-ulan, dagdagan pa umano ang pagbaha kaya hindi rin maibiyahe ang mga produktong ito.

Katunayan ayon kay Caniete, sa public market din ngayon sa bayan ng Kalibo ay kulang na rin ang high valued vegetable, katulad din sa nararanasan ngayong dito sa isla.

Subalit aniya, hindi pa nila masasabi kung hanggang kaylan ang ganitong sitwasyon, dahil nakadepende ito sa panahon.

Samantala, kung kinukulang sa suplay ng high valued vegetable ang Aklan sa kasalukuyan, hindi naman umano apektado ang mga gulay sa palengke na maaaring kunin sa backyard gaya ng talong, sitaw, kalabasa at iba pa.

Ito ay dahil maliban sa ang mga produktong ito na mayroon dito sa probinsiya, puwede rin aniya mag-import mula sa Iloilo. 

P8M pondo mula kay PNoy para sa Tambisaan Port, pinabulaan ni Punong Barangay Sualog


Ni Edzel Mainit, Field Reporter, YES FM Boracay

Sa kabila ng mga bali-balitang nakatanggap na di umano walong milyong pisong pundo ang Barangay Manoc-manoc Council mula kay Pangulong Benigno Aquino III para sa proyektong terminal sa Tambisaan Port, mariin naman itong pinabulaanan Punong Barangay Abram Sualog.

Aniya, totoong humiling sila sa tanggapan ng Presidente may katagal na rin.

Subalit sa kasalukuyan ay hinihintay pa nila ang pondong ito, kasabay ng paglilinaw na walang katotohanan ang yaong mga bali-balitang natanggap na ng Barangay ang funding para sa proyekto.

Kung maaalala, ang Manoc-manoc Council nitong taong 2011 ay humiling na sila na sa Barangay Manoc-manoc ang magpagawa ang Terminal sa Tambisaan Port at isa-ilalim ito sa Economic Enterprise Development Department ng Manoc-manoc.

Bagay na humingi sila ng pondo sa tanggapan ng Pangulo ng bansa. 

Hose na gamit sa pagtatapon ng waste water na kinukonekta sa drainage sa Boracay, ikinabahala ng SB Malay


Ni Edzel Mainit, Field Reporter, YES FM Boracay

Nagpahayag ng pagkabahala si Sangguniang Bayan Member Dante Pagsugiron, Chairman ng Committee on Environment, kaugnay sa napansin nitong naglalakihang mga hose papuntang main road na ikinukonekta sa drainage upang doon itapon ang waste water na nasipsip mula  sa isang ginagawang resort sa station 2.

Ayon kay Pagsugiron maliban sa pagkabahala nito dahil sa ang mga hose ay “eyesore” o di kagandahan para sa mata ng mga turista.

Nagmamalasakit din umano ito dahil sa alam naman ng lahat sa Boracay na ang drainage sa isla ay wala pang sistema at hindi pa ito natatapos.

Ang mga hose pa na ito ay matagal na umano nilang nakita na nakakonekta sa drainage at nangangamba ito na baka mapuno na ng tubig ang drainage at umapaw naman ito sa kalsada.

Dagdag pa dito, minsan na rin aniya niyang ininspeksiyon ang area na ito at naipa-abot na rin sa tanggapan ng Engineering Department partikular kay Malay Municipal Engineer Elezer Casidsid kung saan inihayag din umano ng huli na bawal o hindi pwede ang ganitong gawain.

Kaya hiniling ngayon ng Pagsugiron sa konseho na tulungan ito upang ipatigil ang ganitong gawain at abisuhan na rin ang kina-uukulang para ipa-monitor ang nabanggit na resort. 

Thursday, August 09, 2012

L300 Van sa Tabon Port sa Caticlan, nagrereklamo na!


Ni Edzel Mainit, Field Reporter, YES FM Boracay

Dahil sa nasisikipan na ang ilang grupo ng L300 van sa kanilang kalagayan sa Tabon Port, nagpa-abot ng reklamo ang limang grupo sa tanggapan ng Punong Ehekutibo ng Malay gayon din sa Sangguniang Bayan.

Kaugnay nito, nakatakdang talakayin committee ng transportasyon ng konseho ang usaping ito matapos na malaman na di umano ay tila okupahin na ng iilang grupo lamang ang terminal na para sa mga L300 van doon, samantala ang ibang grupo naman ay tila na-itsapuwera na.

Ang iba pa umano, tulad sa limang nagpa-abot ng reklamo, ay malayo na sa pantalan ang parking area kaya mahirap para sa kanila ang makakuha ng pasahero.

Ayon naman sa tanggapan ng Punong Ehekutibo, sinabi ni Malay Administrator Godofredo Sadiasa na gumawa na sila ng sulat bilang sagot sa apela ng limang grupo ng L300 van.

Pero nilinaw nito na ang lokal na pamahalaan ay nagbigay naman ng lugar para sa mga Van na ito na may rutang Caticlan-Kalibo Airport vice versa at alangang naman aniyang pagpatung-patungin nila ang mga ito doon sa iisang parking area kung may katulad man sitwasyong nangyayari doon. 

Pagpapa-unlad sa Tambisaan Port, hindi pa pwede sa ngayon


Ni Edzel Mainit, Field Reporter, YES FM Boracay

Kahit ramdam ang hirap ng mga pasahero, turista man at lokal na mamayan ng Boracay at nakikita naman ang sitwasyon sa Tambisaan Port, hindi pa umano pwedeng ma-ayos sa ngayong ang Tambisaan Port sa  Manoc-manoc, ayon kay Municipal Economic Enterprise Development (MEED) Manager at Malay Administrator Godofredo Sadiasa.

Ito ay dahil kapag ipatupad umano ang pagsasa-ayos o konstraksiyon dito partikular ang paglalagay ng shade o silungan para sa mga pasahero, aasahang makaka-istorbo ito sa publiko na dumadaan sa nasabing pantalan.

Kaya hihintayin na lang umano na mailipat ang biyahe ng mga bangka pabalik sa rutang Caticlan at Cagban Port bago simulan ang konstraksiyon.

Pero nilinaw nito na imposibleng maipapatupad ang pagsasa-ayos na ito ngayong taon ng 2012 dahil sa ginagamit pa sa kasalukuyan ang Tambisaan Port at ayaw nila na maging sagabal ito sa mga pasahero, kaya hihintayin na lang nilang maging bakante ito.

Gayon pa man, inihayag nitong pinondohan na ng LGU Malay ang proyekto at tapos na ang bidding para sa gagawing pagpapa-unlad ng Tambisaan Port.

Kung mapapansin, ngayong madalas ang pag-ulan sa bansa lalo na dito sa Boracay, tila mga basang sisiw ang mga pasaherong naghihintay na makasampa sa bangka dahil sa walang masisilungan maliban sa maliit na ticket booth doon.

Ang mga pasahero namang kakababa lang ng bangka ay nakikipag-karerahan na lamang sa ulan, diretso sa nakaparadang tricycle sa labasan dahil sa maliit lamang at puno na ang silungan doon. 

Mga nagpapa-inspeksiyon ng helmet sa DTI-Aklan mula sa malalayong bayan, binibigyang priyoridad


Ni Edzel Mainit, Field Reporter, YES FM Boracay

Mariing inihayag ni Department of Trade and Industry (DTI) Aklan Director Diosdado Cadena na free o libre ang pagpapa-inspeksiyon sa mga helmet ng motor na ginagamit ng bawat motorista kasama ang helmet na para sa mga angkas.

Kaya ayon kay Cadena, walang dapat ikabahala ang mga motorista dahil wala naman silang babayaran kahit ilang helmet pa ang ipapa-inspeksiyon ng mga ito.

Aniya, ang gagawin lamang ay dalhin ang helmet sa tanggapan ng DTI sa Kalibo at magdala ng identification card o ID na issued ng gobyerno o kaya ay drivers license para sa aplikasyon upang matatakan ng Import Commodity Clearance o ICC sticker ang helmet kapag pumasa ang helmet sa pagsisiyasat.

Kalimitan umano sa hindi nakakapasa sa mga helmet na dinadala sa kanilang tanggapan ngayon ay yaong may mga crack o sira na, walang strap at kapag ang brand ng helmet ay wala sa listahan ng mga lihitimo dealer at manufacturer na may kwalidad ang prudokto.

Samantala, gayong sa bayan pa ng Kalibo dapat dalhin ang mg helmet at malalayo ang ibang bayan, sinabi ni Cadena na binibigyan naman nila ng konsiderasyon o prayoridad ang nagmula sa malalayong bayan, lalo na kapag marami at nakapila ang nagpapa-inspeksiyon doon.

Nilinaw din nito ngayon na sa kasalukuyan ay wala pa silang balak na magkaroon ng skedyul dito sa Boracay dahil sa kulang din umano sila sa tao. 

Tuesday, August 07, 2012

Mga estudyante sa Manoc-manoc, pahirapan sa pagsakay


Ni Edzel Mainit, Field Reporter, YES FM Boracay

Hirap di umano ang mga estudyante sa Manoc-manoc Elementary at National High School na sumakay ng tricycle nang ipatupad ang Color Coding Scheme sa Boracay.

Ito ang nabatid mula kay Boracay Land Transportation Multi-Purpose Cooperative (BLTMPC) Chairman Ryan Tubi, kung saan ang nabanggit na paaralan umano ay pormal na nag-paabot na ng kanilang reklamo sa tanggapan ng kooperatiba at gayong din sa tanggapan ng Alkalde kaugnay dito.

Sa apelang ipina-abot ng paaaralan, nakasaad aniya doon ang hirap na nadaranasan ng mga estudyante kapag papunta at pa-uwi ng paaralan.

Lalo na kapag ang ruta umano ng mga bangka ay nasa Tambisaan, kaya wala halos tricycle pumapasok papunta ng Manoc-manoc Plaza hanggang Cagban Area.

Kaya ayon kay Tubi, ang reklamong ito ang siyang ipapa-abot din nila sa lokal na pamahalaan ng Malay.  

Kung maaalala kasama sa kundisyon sa pagpapatupad ng coding ay kapag may reklamo na kinukulang na pumapasadang unit ay maaari na itong ipa-kansela lalo kung maraming nagrereklamo. 

Color Coding ng tricycle sa Boracay, magiging 24-oras na


Ni Edzel Mainit, Field Reporter, YES FM Boracay

Kung ngayon ay dose oras lamang ang skedyul ng color coding ng tricycle sa Boracay, simula naman sa Agosto 13 ng kasalukuyang taon ay magiging 24 oras na ang biyehe ng unit na naka-iskedyul sa araw na iyon.

Ito ay dahil ang skedyul ng bawat tricycle depende sa kulay na nakatakda sa naturang araw na ay magiging buong araw at gabi na simula ala-sais ng umaga hanggang ala-sais din kinaumagahan.

Ito ang kinumpirma ni Boracay Land Transportation Multi-Purpose Cooperative (BLTMPC) Chairman Ryan Tubi.

Aniya ito ay batay na rin sa kautusan ng Punong Ehekutibo ng Malay sa paraan ng Executive Order No. 2012-024.

Naniniwala si Tubi na muling binago ang skedyul na ito sapagkat posibleng nakita din ng lokal na pamahalaan ng Malay na kahit na ipinapatupad na ang coding ay mabigat pa rin ang trapiko sa Boracay.

Matatandaang, nailatag na rin sa sisyon ng Sangguniang Bayan ng Malay na pagdating di umano ng rush hour simula ala-sais ng gabi haggang alas siyete, dahil sa nasuspende na ang coding sa oras na ito kaya ang asul at dilaw na mga unit ay pinapahintulutan ng makapagbiyahe.

Ang resulta: mabigat pa rin daloy ng trapiko. 

Proteksiyon sa highway sa Nabas para sa pag-guho ng lupa, muling hiniling


Ni Edzel Mainit, Field Reporter, YES FM Boracay

Nag-request na ng pondo ang Department of Public Works and Highways (DPWH) -Aklan para sa slope protection mula sa pag-guho ng lupa o erosion sa  high way sa area ng Nabas, na siyang itinuturing na kritikal lalo na kapag ganitong panahon na madalas ang pagbuhos ng ulan.

Ito ay ayon kay Engr. Abraham C. Villaruel, OIC District Engineer ng DPWH-Aklan
.
Bagamat hindi nito hinayag kung magkano ang pundong hiling nila, sinabi nitong ngayon ay pasok na ito sa alokasyon ng Calendar Year 2012 ng Tourism Convergence.

Kaya sa kasalukuyan hinihintay pa ng DPWH ang pondong ito upang maiwasan na rin ang insidente ng pagka-stranded ng mga pasahero papunta at mula sa Boracay gayong ito lamang ang tanging daan papuntang bayan ng Kalibo.

Sa ngayon aniya ay na-identify na nila ang mga lugar na madalas may gumuguhong lupa para sa gagawing slope protection na kongrito.

Pero sinabi nito na ang paglalagay ng coconet sa ilang bahagi ng bulubunduking lugar sa gilid ng Highway sa Nabas ay matutuloy parin.

Ngunit pili lamang umano ang area na paglalagyan at ang ibang area naman ay slope protection na kongrito ang ilalagay. 

Pag-demolish sa illegal structure sa Boracay, hindi pa tapos


Ni Edzel Mainit, Field Reporter, YES FM Boracay

Hindi magtatapos sa West Cove lang ang gagawing demolisyon sa mga lumabag na establishemento sa Boracay, dahil may mga susunod pa.

Ito ang nilinaw ni Island Administrator Glenn Sacapaño sa panayam dito.

Kaya hiling nito sa mga mag-ari ng gusali na noon paman ay batid na umano nilang may nalabag silang ordinansa at batas sa bansa kaugnay sa paglalagay ng istaktura sa lugar na hindi puwede.

Sinabi nitong huwag na sana umanong hintayin pa ng mga ito na ang lokal na pamahalaan pa ang mag-patibag ng nasabing mga istraktura.

Aniya matagal nang batid ng mga stakeholder sa isla kung saan ang lugar sa Boracay na hindi maaaring paglatag ng establishimiyento, kaya dapat din umanong maintindihan nila ang aksiyong gagawin ng LGU kung sakali at wala nang sisihan pa.

Kaugnay nito, inihayag din ni Sacapaño na marami na ring natatanggap na mga report ang tanggapan ng Task Force Moratorium on Building Construction sa Boracay hinggil sa illegal na construction sa isla kaya ito rin ang tinututukan nila ngayon.

Kung maaalala, ang lokal na pamahalaan ng Malay sa kasalukuyan ay seryosong ipinapatupad ang kanilang kampaniya hinggil sa illegal na mga straktura tulad na lamang sa pagtatayo ng gusali sa mga pinoprotektahan at kritikal na area, pagtatayo ng gusali ng walang kaukulang dokumento at iba pa.

Samantala, aminano naman ngayon ang administrador na pansamantalang natinigil ang pagtitibag sa illegal na straktura ng West Cove.

Ito ay dahil sa hindi umano makaporma ang demolisyon team, dala ng sama ng panahon, gayong hindi rin makaarangkada ang barge na magdadala ng mga gagamitin tulad ng heavy equipment. 

Monday, August 06, 2012

Isang Boracaynon, nasalisisihan ng taong tinulungan


Ni Edzel Mainit, Field Reporter, YES FM Boracay

Dahil sa awa at pagtitiwala, isang Boracaynon ang sinalisihan ng taong tinulungan.

Dinikwat ng suspek na nag-ngangalang Darrel Pamisaran ng Wawa Pilar Bataan ang isang kalibre 45 na baril at cellphone na pagmamay-ari ni Vicente De Juan y Sacapaño, na siyang nagmagandang loob pa sana sa salarin.

Ayon sa impormasyon mula kay Caticlan Jetty Port Head of Security Richard Alair, pinatuloy di umano ni De Juan ang suspek sa kanilang bahay isang araw palang halos ang nakakalipas dahil sa naaawa ito gayong may problema sa paa si Pamisaran.

Subalit nabulaga nalang ang biktima nang lisanin muna nila ang kanilang bahay sa Manoc-manoc para ayusin ang kanilang kabuhayan kasama ang kaniyang asawa, at sa pagbalik nito, ang kaniyang steel cabinet ay sira na dahil sa pinilit itong buksan.

Mula doon ay nadiskobre nitong ang baril at cellphone ay tinangay na pala.

Agad na ini-report sa Pulisya ang pangyayari at ipinagbigay alam sa Security ng Caticlan Jetty Port.

Dahil sa batid agad nila na ang balak ng suspek ay pumunta sa Mindoro kaya sa pantalan palang ay nasilo na ito.

Nakuha ng grupo ni Alair sa suspek ang baril na tumugma naman sa lisensiyang hawak ni De Juan, gayon din ang cellphone na tinangay nito.

Sa kasalukuyan ay hawak na ng awtoridad ang suspek nang i-turn over ito sa Malay Pulis at nakatakda naman dalhin sa Boracay upang imbestigahan sa umano’y ginawang pagnanakaw. 

JCI, naglunsad ng piso sa bawat lagda para sa proteksiyon ng Boracay


Ni Edzel Mainit, Field Reporter, YES FM Boracay

Kung ilang libo o milyon man ang kikitain mula sa Signature Campaign na ikinasa ng Junior Chamber International (JCI) na pinangalanang “Sama Ka, Lets Protect Boracay”, siya ding gagamiting pondo para sa kanilang programa sa Boracay na bigyan ng sapat na kaalaman ang mga kabataang estudyante dito sa tulong ng Department of Education ng tamang pangangalaga sa kalikasan at sa islang ito.

Sa bawat lalagda na makakalap na siyang pagpakita ng kanilang pangako na po-protektahan din ang Boracay, piso ang kapalit nito.

Nabatid sa press conference nitong tangghali ng JCI na ang pisong maiipon mula dito ay siyang pundo din nila para sa mga lecture materials na ipapamigay at gagamitin ng mga estudyante sa isla.

Bagamat sila umano sa JCI ay walang pondo para dito, ang maitutulong umano nila ay pukawin o kalampagin ang damdamin ng iba’t ibang pribadong indibidwal o organization maging mga stakeholder upang sopurtahan ang adbokasiyang ito na “Sama Ka, Lets Protect Boracay”.

Positibo naman ang pananaw ng JCI na magiging matagumpay ang programang ito, gayong sila ay nais din nilang proteksiyunan ang Best Beach in the World na titulong iginawad sa Boracay. 

Bagong organisasyong JCI, magkakaroon ng signature campaign para sa proteksyon ng Boracay


Ni Edzel Mainit, Field Reporter, YES FM Boracay

Isang organisasyon na naman ngayon ang interesado at nagnanais na makatulong para sa proteksyon ng Boracay.

At kung ang lokal na pamahalaan ng Malay ay may “Sali ako Diyan” ang organisasyong Junior Chamber International o JCI ay may “Sama ka, Let’s protect Boracay” naman.

Layunin ng programang ito na magkaroon ng signature campaign na sisimulan ngayong araw.

Maliban sa pagnanais na ma-protektahan at ma-preserba ang Boracay ay adbokasiya din nila na makakalap ng pondo para maisailalim sa pagsasanay ang mga estudyante at bagong henerasyon ng isla kung papaano gagawin upang mapanatili ang ganda ng islang ito.

Kasama sa signature campaign na ito ang pagkalap ng piso sa bawat lalagda, na siyang gagamitin para sa lecture materials na gagamitin sa training ng bawat estudyante sa tulong at suporta rin ng DepEd.

Kaugnay nito, positibong pagbabago para sa isla ang target ng JCI at magagawa ito sa tulong ng bawat mamamayan, lokal na pamahalaan ng malay at BFI na nagpahayag na rin ng kanilang suporta sa programang ito.

Sand bagging sa beach ng Boracay, ipinagbabawal!

Ni Edzel Mainit, YES FM Boracay

Atensyon sa mga resort owners sa Boracay!

Mariing nilinaw ni Island Administrator Glenn Sacapaño na bawal talaga na ilagay sa sako ang mga buhangin sa front beach kahit pa ginagawa itong proteksiyon sa mga establishemento sa isla.

Ito ay dahil sa mahigpit na ipinapatupad ang Ordinansang bawal kunin ang buhangin sa baybayin ng Boracay.

Subalit maliban dito, kung ang layunin umano sa pagkuha ng buhagin ay gawing sand bag para iharang sa tubig na umaakyat na hanggang sa dampa ng mga resort.

Sinabi nito na bawal pa rin ang paglalagay sana ng harang sa tubig dahil sa pinipigilan nito ang natural na daloy ng tubig kaya ang katabing resort ang nagsasakripisyo dahil sa doon tatama ang sand erosion.

Lalo pa at kapag habagat season umano ay nararanasan naman ang ganitong sitwasyon kaya mainan na hayaan nalang ang natural na daloy ng tubig sa dalampasigan.

Dagdag pa nito, ang paghukay lamang makuha ang mga buhanging ito para ilagay sa sako ay may malaki umanong epekto sa daloy ng tubig, kaya ang gawaing ito ay hindi nila pinahihintulutan.

Aminado din ito, na sa ngayon ay marami na silang nahuli na gumagawa ng ganito, kaya bilang aksiyon ng lokal na pamahalaan ng Malay nakatakdang ipatawag ang mga ito para pagpaliwanagin at mapaliwanagan na rin.

Bunsod nito, hiniling ng Administrador na sana ay maintindihan din ng lahat na bawal ang pagkuha ng buhangin sa front beach kung gagawing sand bag lang naman.

Payo nito na humanap nalang umano ng ibang pagkukunan, huwag lang sa beach line.

Inutusan na rin aniya nito ang taga pagpatupad ng ordinansa na isyuhan ng violation ticket ang mahuling lumalabag.

Kung mapapansin halos ang ibang dampa ng resort sa isla ay nakain na rin ng tubig, dahil sa nararanasang malakas na hangin at alon kapag habagat season. 

Turistang muntik nang malunod, nasagip ng Lifeguard


Ni Malbert Dalida, News Director, YES FM Boracay

Bakas sa mukha ng bente sais anyos na turista ang pasasalamat matapos masagip ng lifeguard noong Biyernes ng hapon.

Muntik na kasi itong malunod habang naliligo sa Manoc-manoc beach, nang tangayin ito ng malalakas na alon.

Napag-alamang ang muntik nang mabiktimang si Ryan Taborada ng Cebu ay napansin na lamang ng kanyang mga kasamang naliligo na halos nasa limampung metro na ang layo sa kanila at animo’y nalulunod na.

Kaagad nagpasaklolo ang kapatid nito sa mga lifeguard na naroon kung kaya’t kaagad din itong nailigtas.

Nang makausap naman ng Yes FM ang nakampanteng si Ryan ay kanyang sinabi na wala naman itong nainom na tubig-dagat dahil sa nasabing insidente.

Minarapat din nitong huwag na munang bumalik at maligo sa dagat, at sa halip ay naupo na lamang sa dalampasigan at minasdan ang malalakas na alon.    

Isyu sa Circumferential Road ng Boracay, hindi pa nareresolba


Ni Edzel Mainit, Field Reporter, YES FM Boracay

Bagamat may mga bagay pang dapat plantsahin at kailangang resolbahin ang Department of Environment and Natural Resources (DENR) at Department of Public Works and High Ways (DPWH) kaugnay sa isyu ng Circumferential Road sa isla ng Boracay, inihayag ni Engr. Abraham Villareal, OIC District Engineer ng DPWH-Aklan, na nakatanggap na ng paabiso sa paraan ng Notice to Proceed ang DPHW para ituloy ang kontraksiyon ng kalsadang ito sa isla.

Kung maaalala, pansamantalang ipinatigil ng DENR Regional Office ang proyektong ito ng DPWH Regional Office-6 dahil sa may ilang bahagi ng protected area ng isla ang nasira o sinira nang ipatupad ang proyekto circumferential road.

Pero sa ngayon ayon kay Villareal, muling itinuloy ang konstraksiyon ng proyekto pero sa mga piling area lamang.

Aniya, iniwasan munang galawin ang mga nasa kritikal na bahagi ng proyekto hanggang sa mareresolba na ang problema sa gitna ng dalawang ahensiyang ito.

Sa usapin naman kaugnay sa road right of way o dadaanan ng proyekto sa back beach particular sa Bolabog area, aminado si Villareal na sa kasalukuyan ay hindi pa ito lubusang nasusulusyunan.

Matatandaang, naging kontrobersiyal ang proyektong ito nang tambakan ang bahagi ng lawa sa Balabag upang maging bahagi ng kalsadang ginagawa, gayon din ang pagdaan ng proyekto sa beach line ng Bolabog at may ilang lot owner o claimants ang ayaw ding magbigay daan para sa proyekto.

Opisina ng TIEZA sa Boracay, malapit nang buksan


Ni Edzel Mainit, Field Reporter, YES FM Boracay

Ngayong katapusan ng Agusto na inaasahang mabubuksan ang tanggapan ng Tourism Infrastructure and Enterprise Zone Authority (TIEZA) dito sa Boracay katulad sa minsan na rin naipangako ng ahensiyang ito.

Ito ang nabatid mula kay Boracay Island Water Company (BIWC) Customer Service Officer Acs Aldaba.

Aniya sa impormasyon, pormal na papasinayaan ang tanggapan ng TIEZA sa katapusan ng Agusto kasabay ng pagtatapos sa ginawang konstraksiyon dito.

Kaya malamang, sa buwan pa umano ng Setyembre ay magsisimula na ang operasyon ng TIEZA sa isla.

Ganoon pa man, hindi pa masiguro, ayon kay Aldaba, na ngayong may tanggapan na ang TIEZA dito sa Boracay ay kung tumatanggap ang mga ito ng reklamo kaugnay sa suliraning nararanasan sa Drainage System ng Boracay.

Subalit positibo naman pananaw nito na malamang ay tatanggapin din ng TIEZA ang mga ipaabot na concern hinggil sa problemang nabanggit.

Ito ay sa kabila ng pagkaka-alam ng BIWC na maglalagay ang TIEZA ng opisina nila sa Boracay upang ma-monitor at maalalayan ang kumpaniyang ito ng tubig sa kanilang operasyon at masigurong nasusunod ang regulasyong ipinapatupad ng TIEZA.

Kung maaalala ang BIWC na ang sumalo ng batikos at lahat ng hinanaing ng publiko kaugnay sa suliranin sa drainage.

Subalit limitado lamang ang impormasyon na naibibigay ng BIWC, sapagkat ang TIEZA na dating Philippine Tourism Authority (PTA) ang may gawa ng Drainages sa  Boracay kaya sila lang din ang may kapasidad na sumagot sa isyu.

Bagay na inaabangan naman ng marami ang pormal na pagbubukas sa tanggapang ito lalo na ng mga stakeholder sa isla, maging ng lokal na pamahalaan ng Malay dahil ang mga nabangit na ito kasama na ang BIWC ay naging tampulan ng usap-usapan dahil sa palpak na Drainages sa isla.

Sa kasalukuyan, ginagawa na ang opisinang ito na makikita sa Barangay Balabag, malapit din sa opisina ng BIWC.

Pananagutan sa mga nabiktima sa Seas Sport activity, ipinauubaya ng PCG-Caticlan sa may-ari


Ni Edzel Mainit, Field Reporter, YES FM Boracay

Ipinauubaya ng Philippine Coast Guard Caticlan ang pananagutan sa may-ari ng Sea sports sa mga nabiktima nilang kliyente ng masamang panahon nitong nakaraang linggo kung saan halos sunod-sunod ang naitalang aksidente.

Ito ay dahil kapabayaan ito sa bahagi ng mga Sea Sports operator.

Ito ay makaraang maaksidente ang may tatlong turista nitong Sabado ng pagkapatid sa tali na ginagamit sa Para Sailing, kaya ang grupo ng turistang ito ay na-ospital sa bayan ng Kalibo ng tangayin ng malakas na hangin, maliban pa sa insidente na nangyari noong nagdaang Biyernes.

Bunsod nito, para hindi na masundan pa ang pangyayaring ito, pansamantalang ipinakansela ng Coast Guard ang operasyon ng parasailing lalo pa at pabugso-busgo umano ang hangin sa kasalukuyan.

Ngunit kung makita umano ng Coast Guard Boracay na kalmado na ang panahon at i-rekomenda ng ahensiyang ito sa isla na ligtas na ang magsagawa ng aktibidad katulad  ng Para Sailing ay pahihintulutan na lang na ituloy ang operasyon ng aktibidad na ito.

Maliban dito, aasahan na rin ayon kay PCG-Caticlan Acting Station Commander Chief PT Officer Ronnie Hiponia na magkakaroon ng random inspeksiyon ang Coast Guard sa mga gamit na ginagamit sa seas sports sa area ng Bolabog o Back Beach kung saan ginagawa ang iba’t ibang aktibidad gaya nito.

Ito ay upang masiguro ang kaligtasan ng mga turista na umaasa umanong sa bawat bayad nilang ibinibigay kapalit ng serbisyo sa bawat aktibidad ay ligtas din ang mga ito. 

Pagsampa ng RoRo sa Caticlan Jetty Port, pahirapan; biyahe, tuloy pa rin

Ni Edzel Mainit, Field Reporter, YES FM Boracay

Aminado ang Philippine Coast Guard Caticlan Station na hanggang sa ngayon ay pahirapan parin ang pag-duck o pagsampa ng barkong pang Roll-On Roll Off (RoRo) sa Caticlan Jetty Port dahil sa naglalakihan at malakas na alon.

Dahil dito, ayon kay PCG Caticlan Acting Station Commander Chief PT Officer Ronnie Hiponia, bahagyang naantala ang pagpapababa at pagpapasakay sa mga pasahero mula sa Roxas Oriental Mindoro dito sa Jetty Port dahil kailangan pang hintayin aniya ng kapitan ng mga barkong ito na humupa o kumalma ang dagat bago makasampa sa pantalan.

Pero sinabi nito na dito lamang sa Caticlan ang pahirapan, sapagkat hindi naman ganoon kalakas ang alon sa Roxas, Oriental Mindoro.

Maliban dito, nadagdagan din ayon sa opisyal ng halos apatnaput limang minuto ang biyahe ng RORO sa rutang ito dahil kailangan pang baybayin ng barko ang area ng Caluya Antique papuntang Caticlan vice versa, lamang makaiwas sa malalaking alon at para sa ligtas na paglalayag ng mga pasahero.

Subalit ganoon man kahirap ang pag-angkla sa Caticlan, tuloy pa rin umano ang biyahe ng RoRo sa ngayon.

Sa kabilang banda naman, dahil sa ang RORO ay kinakargahan ng toni-toneladang cargoes kasama na ng mga truck van, nilinaw nito ngayon na ang mga karga ng barko, bago paman umalis ay tinitimbang ito sa Caticlan Jetty Port upang maging balanse ang laman para sa maaayos na paglalayag.

Dagdag pa nito, mariing sinusunod din aniya ang regulasyon ng pantalan na limitado lamang sa 35 tons ang karga at kapag lumapas ay pinababawasan na ito.

Samantala, dahil sa patuloy na nararanasan ang malakas na alon sa karagatan, may babala ngayon si Hiponia sa mga mangingisda lalo na ang may mga maliit na bangka, na hanggat maaari ay iwasan na ang pumalaot lalo na sa ganitong panahon.

Ganoon din, mahigpit ang paalala ni Hiponia kaugnay sa pansamantalang pagpapatigil sa paliligo sa front beach ng Boracay upang maiwasang masundan pa ang insidente ng pagkalunod. 

Sumadsad at nasunog na MV Shuttle Roro 1 sa Romblon, kinumpirma ng Philippine Coastguard


Ni Malbert Dalida, News Director, YES FM Boracay

Opisyal nang kinumpirma at inilathala ng Philippine Coastguard ang sumadsad at nasunog MV Shuttle Roro 1 sa Romblon noong nakaraang Lunes.

Sa inilabas nitong report sa kanilang web site, nabatid na napilitang sumilong muna ng nasabing barko sa Looc Bay, Romblon.

Nakasagupa umano kasi ito ng masungit na panahon dahil sa hagupit ng bagyong si Gener. 

Subali’t nabatid na sa kasamaang palad ay tuluyan itong sumadsad hanggang sa magsimulang masunog at pinasaok ng tubig.

Dahil dito, kaagad nagdeklara si Captain Felix Solidio ng abandone ship nang unti-unti na itong lumubog.

Napag-alamang galing Dumaguit papuntang Batangas ang nasabing barko na may lulang limampu’t pitong pasahero at apa’t napu’t walong crew.

Kaagad namang rumesponde ang Coastguard Romblon at nagsagawa ng Search and Rescue Operation dahilan upang madala sa ligtas ng lugar ang mga pasahero, kasama ng isang casualty na si Ernesto C. Flores.

Nasa halos pitumpong porsiyento na umano ang bahagi ng nasusunog na barko nang maratnan ng Coastguard Romblon.

Pagtutulungan para sa kaligtasan ng mga naliligo sa beach ng Boracay, iginiit ng Lifeguard


Ni Malbert Dalida, News Director, YES FM Boracay

“Magtulungan na lang”.

Ito ang iginiit ng lifeguard kaugnay sa kaligtasan at halos magkakasunod na insidente ng pagkalunod sa beach ng Boracay.

Sa panayam ng himpilang ito kay life guard commander at BFI Member Mike Labatiao, sinabi nitong nariyan na ang mga miyembro ng BAG o Boracay Action Group katulad ng Pulis, Coastguard, Auxiliary Police at First Responder upang matugunan ang mga nasabing insidente sa isla.

Maging ang mga sekyu sa beach front ay sinasabihan narin umano nila na tumulong sa pagpaalala sa mga turistang mag-ingat o huwag na munang maligo sa dagat lalo na kapag masama ang panahon.

Kaugnay nito, aminado naman si Labatiao na halos trenta porsiyento sa kanilang mga pinaalalahanan ay nagpupumilit o umaalma, dahil sa gumastos nga naman ang mga ito lamang makapunta at mag-enjoy sa Boracay.

Samantala, idinepensa din nito ang tungkol sa kadalasa’y kawalan ng nakabantay na lifeguard sa mga tower.

Maliban sa 8 to 5 na pagtatrabaho umano ng mga ito ay kailangan ding bumaba ng tower upang mag break o di kaya’y magsagawa ng foot patrol.

Tiniyak din ni Labatiao na ang mga lifeguard sa Boracay ay sertipikadong sinanay sa pagbibigay ng first aid at pagliligtas ng buhay.

Matatandaang nitong nagdaang araw ng Linggo ay dalawang magkapatid na taga Iloilo ang nabiktima ng pagkalunod kung saan isa ang nasawi at isa naman ang nailigtas.

Mga insidente ng pagkalunod sa Boracay, ipinaliwanag ng Lifeguard


Ni Malbert Dalida, News Director, YES FM Boracay

Mayroon nang megaphone, pito at teleskopyo, dagdagan pa ng 8 to 5 na pagbabantay ng mga sinanay na lifeguard sa limang tower sa beach front ng Boracay.

Subali’t aminado pa rin ang lifeguard na hanggang sa ngayon ay may mga insidente pa rin ng pagkalunod sa isla, sa kabila ng umano’y mahigpit nilang pagmomonitor at pagpapatrolya lalo na kapag masama ang panahon.

Ayon kay lifeguard commander Mike Labatiao, maliban sa may mga gustong maligo sa dagat na talagang dine-dedma ang mga kanilang mga paalala kahit malakas ang alon, sinabi nitong kapag habagat at masama ang panahon, ang buhangin sa ilalalim ng tubig ay hindi pantay at palalim ng palalim papuntang gitna.

Dahilan ng mas malaking tsansa ng isang swimmer na mataranta at malunod.

Bagay na itinuro nito ang ipinagkaiba ng sitwasyon ng buhangin sa dalampasigan ng sitio Angol station 3 papuntang station 2, at mula sa station 1.

Sa station 1 umano kasi ay may mga natural na break water kung kaya’t napipisa na agad ang alon bago makarating sa dalampasigan.

Ayon pa kay Labatiao, mas marami ang mga napapansin nitong nabibiktima ng pagkalunod sa mga naunang nabanggit na bahagi ng isla kung ikukumpara sa station 1.

Samantala, maliban sa mga natural na dahilan ng insidente ng pagkalunod sa isla, natuklasan din umano nito na halos nasa animnapung porsiyento ng mga nalulunod ay nasa impluwensya ng alak.

Magkaganon paman, iginiit parin ni Labatiao na sila sa Boracay Action Group, First Responder, Coastguard at PNP ay hindi nagkulang sa pagbabantay sa mga naliligo sa dagat ng “2012 World’s Best Beach Island”.