YES THE BEST 911 BORACAY

Saturday, May 18, 2013

Boracay Day at ika-3 taon ng Boracay Beach Management Program, ipagdiriwang ngayong araw

Ni Peach Ledesma, YES FM Boracay

Matapos ang labimpitong araw ng pag-gawa, sa ika-labingwalong araw, ay ipagdiriwang at gugunitain na ang bunga ng mga paghihirap ng mga nagmamalasakit sa isla ng Boracay.

Ito ay sa pamamagitan ng isang programa bilang selebrasyon ng Boracay Day at ikatlong anibersaryo ng Boracay Beach Management Program (BBMP).

Gaganapin ito ngayong araw na magsisimula mamayang alas-tres ng hapon.

Ayon kay Al Lumagod ng Boracay Foundation Inc. (BFI) at isa sa mga event coordinators, ang Boracay Day umano ay ang pagdiriwang sa mga pinag-hirapan ng iba’t-ibang organisasyon at kumpanya upang protektahan at alagaan ang isla ng Boracay.

Ito rin umano ay ang produkto ng Branding Boracay Workshop sa pangugnuna ni Malay Mayor John Yap na ginawa noong a-otso hangggang a-nuebe ng Abril ng kasalukuyang taon.

Anya, sa tulong na rin ng BFI ay pinagplanuhan ang mga magiging aktibidad ngayong Mayo bago ang mismong selebrasyon ng Boracay Day.

Sa nasabing workshop ay boluntaryo din umanong nag-commit ang iba’t-ibang organisasyon at kompanya ng kanilang mga pangako upang mapangalagaan ang isla.

Samantala, inaasahang sa nasabing programa ay dadalo ang iba’t-ibang organisasyon na aktibong nangangalaga sa isla ng Boracay, at ang ilang indibidwal tulad na lamang nina Mayor Yap at artist-musician Joey Ayala bilang special guest.

Kasabay nito ay nananawagan din si Lumagod na sana ay pangalagaan ng publiko, lalo na ng mga stakeholders at ng mga Boracaynon, ang isla ng Boracay dahil nag-iisa lamang ito at wala nang katulad pa nito sa buong mundo.

Dapat din umanong gawin ng lahat ang kanilang share hindi lamang para sa ikabubuti ng kasalukuyan kundi para na rin sa susunod na mga henerasyon.

Ang selebrasyon ng Boracay Day at BBMP 3rd Anniversary ay may layuning magkaroon ng volunteerism at commitment mula sa mga stakeholders, mga indibidwal at organisasyon sa isla na ibalik ang pabor na ibinibigay ng Boracay sa mga ito.

Matatandaang noong mga nakaraang selebrasyon ng Boracay Beach Management Program ay isinasagawa sa buwan ng Setyembre, ngunit sa bisa ng executive order ay inilipat ito sa buwan ng Mayo at deklarado bilang isang special non working holiday sa bayan ng Malay.

Friday, May 17, 2013

Malay PNP, naka-alerto pa rin kahit tapos na ang eleksyon

Ni Shelah Casiano at Bert Dalida, YES FM anf Easy Rock Boracay

Matapos maideklara ang mapayapang eleksyon sa bansa nitong Lunes, ang mga pulis namang naka-deploy sa iba’t-ibang himpilan para sa halalan ay nakabalik na sa kani-kanilang istasyon.

Magkaganoon pa man, nananatili pa rin silang nakaalerto kahit tapos na ang eleksyon.

Sa katunayan, ayon kay PO1 Lou Dela Cruz ng Malay PNP, patuloy pa rin silang nagbabantay para sa gun ban at nagsasagawa ng mga check points. 

Epektibo pa rin umano kasi ang gun ban hanggang ika-12 ng Hunyo, habang ang liquor ban ay tapos na.

Sinabi pa ni Dela Cruz na wala namang naitalang karahasan sa bayan ng Malay kaugnay sa kakatapos na halalan.

Samantala, nanawagan din ng patuloy na suporta sa publiko ang Malay PNP.

Haresco-Miraflores tandem, ipinroklama nang nanalo sa 2013 Midterm Elections sa Aklan

Ni Bert Dalida, YES FM Boracay

Ipinroklama na ang mga nanalong kandidato sa 2013 automated local elections sa probinsiya ng Aklan.

Dinomina ng administration candidate na si Joeben Miraflores ang gubernatorial race laban kay Ramon Legaspi Jr.

Lumabas sa official result na ang three-termer congressman na si Miraflores ang nanguna sa boto sa pagka-gobernador nga may 123,034 votes kumpara kay Legaspi na may total votes na 98,974.

Sa bise gobernador, nanguna sa pa rin si Billie Calizo-Quimpo kontra kay Victor Manuel Garcia.

Si Calizo ay may 117,605 votes habang ang kanyang karibal hay may 90,409 votes.

Nanalo naman ang "Ang Kasangga" partylist representative Teodorico Haresco, Jr. laban kina Antonio Maming, Ning Cabagnot at Ramy “Nono” Panagsagan.

Si Haresco ay may 104,971 votes kumpara sa kanyang karibal na si Maming na may 96,502 votes.

Samantala, nabatid na sa 17 bayan sa Aklan, ay 11 LP o Liberal party candidates ang nakapasok bilang mayor, maliban sa bayan ng Balete, Banga, Buruanga, Kalibo, Makato at New Washington.

Nitong alas-5:00 ng hapon ay muling nag-convene ang mga-taga provincial board of canvassers upang makompleto ang listahan ng SP member sa Eastern side.

Eleksyon sa Aklan, mas naging mapayapa ngayon --- APPO

Ni Jay-ar M. Arante, YES FM Boracay

Sa kabila ng protestang naganap sa Bayan ng Buruaga, positibong sinabi ngayon ng Aklan Provincial Police Officer (APPO) na naging mapayapa ang midterm election sa buong probinsya ng Aklan.

Ayon kay Public Information Officer PO3 Nida Gregas, sa kabuuan umano ay naging mapayapa ang nasabing eleksyon at walang mga naitalang kaguluhan maliban lamang sa nasabing bayan.

Bagamat bago naman isinagawa ang eleksyon sa probinsya ng Aklan ay may mga lumabag sa batas kaugnay sa pagdadala ng ipinag babawal na armas.

Pero, aniya, sa panahon ng eleksyon hanggang sa matapos ito ay nanatili namang matiwasay.

Dagdag pa nito, bagamat natagalan umano ang pag-proklama sa mga nanalong kandidato sa Aklan ay nanatiling kalmado parin ang mga taga-suporta lalo na ang mga politiko.

Naniniwala din umano si Gregas na mas naging maayos ang eleksyon ngayong taon kaysa noong 2010.

PPCRV Aklan, naniniwalang honest at orderly ang nangyaring halalan

Ni Bert Dalida, YES FM Boracay

“Honest at orderly.”

Ito ang paniniwala ng PPCRV o Parish Pastoral Council for Responsible Voting sa nangyaring halalan sa Aklan.

Bagama’t sa panayam ng himpilang ito kay Aklan PPCRV Coordinator Reverend Father Ulysses Dalida.

Sinabi nito na sila sa PPCRV ay nakaranas parin ng ilang problema kaugnay sa pagtransmit ng Precinct Count Optical Scan o PCOS machine.

Maging ang kanilang pagkakaroon dapat ng kopya ng ER o election returns mula sa COMELEC ay nagkaroon din ng problema, kagaya sa nagdaang eleksyon.

Sa kabilang dako, ipinaabot parin nito ang pagbati ng PPCRV sa lahat ng mga naihalal na mga kandidato sa Aklan.

Hinimok din nito ang mga hindi pinalad ngayong halalan na maglingkod parin kahit sa anong paraan, katulad umano sa kanilang naging pangako bago mag-eleksyon.

Island Administrator Glenn Sacapaño, kakausapin ang Malay Engineer’s Office kaugnay sa proyekto ng isang telecommunications company sa isla

Ni Kate Panaligan at Bert Dalida, YES FM at Easy Rock Boracay

Sakit sa ulo ang dulot ng mabigat na daloy ng trapiko sa mainroad ng barangay Balabag.

Ganito ilarawan ng mga motorista ang mga pasahero ang nasabing lugar araw-araw.

Maliban dito, pangit na impresyon din ang dulot nito sa mga turista sa isla.

Ang masaklap, medyo matatagalan pa bago matapos ang kalbaryong dulot ng mabigat at nakakaubos ng pasensyang trapiko sa publiko.

Ayon kasi sa isang operator ng ginagawang proyekto doon, ang nasabing proyekto ng isang telecommunications company ay aabutin pa ng mahigit tatlong buwan bago matapos.

Kapansin-pansin namang kung minsan ay walang taga municipal auxiliary police o tanod ang nagkokontrol ng trapik doon, dahilan upang lalo itong lumala.

Kung minsan naman ay meron, at kung minsan ay ang mismong trabahador ng proyekto ang naroon.

Bagay na sa panayam ng himpilang ito kahapon kay Boracay Island Administrator Glenn Sacapaño.

Sinabi nito na kanyang kakausapin ang mga taga engineer’s office ng Malay, upang malaman kung ano ang nilalaman ng permit ng nasabing proyekto, at upang maaksyunan ang problemang trapiko.

Mga bagong halal na mga kandidato sa Malay, susuportahan ng BFI

Ni Jay-ar M. Arante, YES FM Boracay

Susuportahan ngayon ng mga stakeholders ng Boracay ang mga bagong halal na kandidato sa bayan ng Malay.

Ayon kay Boracay Foundation Incorporated Dionesio Salme Sr., susuportahan nila ang mga pulitikong nanalo, dahil para din umano ito sa ikabubuti ng bayan ng Malay lalo na sa isla ng Boracay.

Inaasahan naman umano nito na tutulong ang mga bagong halal na kandidato dahil ito naman ang kanilang ipinangako.

Umaasa din umano si Salme na tutulong sa alkalde ang mga bagong halal na ito, para sa ikakabuti ng Malay, lalo pa’t kasama nila ang LGU sa Boracay Beach Program.

Mensahe pa nito na sana’y matupad nila ang kanilang mga ipinangako noong sila’y nangangampanya pa lamang.

Pagkapanalo ni Aklan congressional candidate Teodorico Haresco, “trending” sa Kalibo

Ni Bert Dalida, YES FM Boracay

“Trending” ngayon sa bayan ng Kalibo ang pagkapanalo ni congressional candidate Teodorico Haresco.

Bagay na inabangan at pinagpistahan din ng mga taga-lokal na media sa Aklan ang nasabing eksena.

Bandang alas-singko kahapon ng umaga nang mangyari ang proklamasyon sa mga nanalong mga kandidato sa Aklan, partikular ang sa hanay ng congressional candidates.

Sinaksihan naman ng mga taga-Sangguniang Panlalawigan Session Hall ang nasabing proklamasyon na doon mismo ginanap.

Lumakas lalo ang usap-usapan maging dito sa bayan ng Malay, kung saan maging ang himpilang ito ay nakatanggap ng kaliwa’t-kanang katanungan mula sa publiko.

Ayon sa report mula sa Kalibo, Aklan, nangibabaw ang nakuhang boto ni Haresco sa kanyang katunggaling si Antonio Maming ng United Nationalista Alliance (UNA).

Base naman sa official na resulta mula sa Comelec Malay, lamang din sa total number of votes si Haresco laban kay Maming.

Thursday, May 16, 2013

PPCRV Boracay, may panawagan sa mga bagong halal na politiko

Ni Jay-ar Arante, YES FM Boracay

Inihayag kahapon ng hepe ng Boracay Tourist Assistance Center (BTAC) na naging mapayapa ang nangyaring midterm election sa isla ng Boracay.

Ganito din ang naging pahayag ng Parish Pastoral Council for Responsible Voting (PPCRV).

Ayon sa PPCRV, maging sila ay tiwalang naging maayos ang isinagawang halalan sa isla.

Ganoon pa man, napansin umano nila na bagama’t walang naging problema sa botohan, ngunit may ilan pa rin umanong mga pasaway na taga suporta ng mga kandidato ang nagbibigay ng mga sample ballot at mismong sa lugar pa na pinagdarausan ng eleksyon.

Bukod dito, may ilan din umanong nakitaan ng “vote buying”.

Dapat umano may distansya ang mga ito sa mismong polling places dahil ito anila ay mahigpit na ipinagbabawal ng Comelec.

Ngunit kung may vote buying, mayroon din naman umanong naging tapat at mga tumanggi sa iniaalok na bayad sa boto mula sa ilang mga supporters ng mga kandidato.

Sinikap din umano ng PPCRV na gampanan ang kanilang trabaho para sa maayos na halalan, kaya’t naging matagumpay itong nairaos.

Samantala, panawagan naman nito sa mga bagong halal na politiko na magampanan nilang mabuti ang kanilang trabaho para sa ikakabuti ng mamayan lalo na sa isla ng Boracay at buong bayan ng Malay.

Ang PPCRV ay isang national lay movement ng simbahan na itinatag noong 1991.

Wednesday, May 15, 2013

Comelec Buruanga: “No comment” RE: kaguluhan sa munisipyo sa pagitan ng mayoral candidates

Ni Bert Dalida, YES FM Boracay

“Depende na lang sa kanila.”

Ito ang sinabi ni Comelec Officer Jessie Mangilaya, kaugnay sa nangyaring kaguluhan sa munisipyo kahapon ng hapon sa Buruanga.

Sa panayam ng himpilang ito kay Mangilaya, sinabi nito na nangyari ang kaguluhan matapos niyang iproklama ang mga nanalong kandidato doon.

Nagtipon umano kasi sa plaza ang mga supporters ni Cajilig at hindi pinalabas ang mga taga board of canvassers.

Ito’y matapos nag-file ng complaint letter si mayoralty candidate Atty. Daniel Cajilig sa Comelec upang i-hold o huwag munang iproklama ang mga nanalo.

Subali’t ang siste: natapos na ni Mangilaya ang proklamasyon, kung kaya’t nagsimula ang kaguluhan.

Na-stranded din daw sila ng dalawang oras sa loob ng munisipyo, at nakalabas lamang matapos asistihan ng mga pulis at mga sundalo.

Samantala, iginiit naman ni Mangilaya na nai-proklama na nito ang mga nanalong kandidato, bago nito natanggap ang complaint letter ni Cajilig.

Kung kaya’t depende na lang sa kampo ni Cajilig sa kung ano ang magiging disposisyon nila kaugnay nito.

Kaugnay parin sa nasabing balita, bukas at patas ang himpilang ito sa mga kampo o panig na nagnanais magbigay ng kanilang pahayag.

Eleksyon sa isla ng Boracay, naging mapayapa

Ni Jay-ar Arante, YES FM Boracay

Naging mapayapa at naging matagumpay ang isinagawang May 13, 2013 Midterm Elections, partikular na sa Isla ng Boracay.

Ayon kay Sr/Insp. Joeffer Cabural, naging matagumpay umano ang naganap na halalan dito sa isla dahil sa kabila ng kanilang isinagawang pag momonitor sa mga lugar na pinag darausan ng eleksyon ay wala umano silang naitalang insidente o komusyon.

Dagdag pa nito, sa ipinatupad ng Comelec na liquor ban ay nakiisa naman ang mga tao sa isla kung saan wala namang naging pasaway na lumabag sa batas.

May ilan din umanong establisyemento ang nag bukas at nag-benta ng mga nakakalasing na alak pero binebenta lamang nila sa mga foreigner.

Isa lamang ito sa mga patunay na patuloy na sumusunod ang mga mamayan sa isla sa mga pinag babawal ng gobyerno lalo na at may kinalaman sa isinasagawang halalan sa bansa.

Sa kabila ng mga di pagsang-ayon, alkalde ng Buruanga, nakasandal sa deklarasyon ng Comelec sa kaniyang panalo

Ni Christy Dela Torre, YES FM Boracay

Idineklara na kahapon ng Comelec Buruanga ang mga kandidatong nanalo mula sa Alkalde hanggang sa konsehal.

Kung saan idineklara ng Comelec sa Buruanga bilang Alkalde si Quezon Labindao.

Ngunit kasabay nito ay marami ang nagbigay ng di pag-sang ayon sa naturang deklarasyon ng Comelec kung saan ayon sa natanggap na mga reklamo ng himpilang ito ay wala umanong katotohanan ang inihayag ng Comelec.

Hindi rin umano matanggap ng kampo ng kalaban ni Labindao na si Atty. Daniel Cahilig na ang incumbent Mayor pa rin ang nanalo.

Ngunit sa naging panayam kay Labindao, sinabi nitong paninira lamang ng kaniyang mga kalaban ang mga kumakalat na di-umano’y protesta kaugnay sa kaniyang panalo.

Wala na rin umanong magagawa ang mga ito dahil proklamado na ito ng Comelec, katunayan maging siya ay nakasandal din at naniniwalang siya ang nanalo base na rin sa naging deklarasyon ng Comelec doon.

Mga nanalong kandidato sa Boracay, nagbunyi!

Ni Christy Dela Torre, YES FM Boracay

Dalawang araw matapos ang May 13, 2013 Midterm Elections, tila nakahinga na ng maluwag ang mga kandidatong tumakbo ngayong halalan.

Sa isla ng Boracay at buong bayan ng Malay ay naging mainit ang labanan ng mga kandidato partikular na sa posisyon bilang councilor.

Ngunit, sa mismong araw ng halalan ay tila naging kalmado din ang mga ito hanggang sa matapos ang halalan at mai-proklama ng Comelec ang mga nanalong kandidato.

Samantala, kahapon, Mayo a-14, kapansin-pansin na kaliwa’t-kanan ang ginagawang pasasalamat at pagbubunyi ng mga pulitikong nailuklok sa posisyon, lalo na yaong mga nanatili sa posisyon bilang Sangguniang Bayan Member.

Base sa pakikipanayam ng himpilang ito sa ilang mga nanalong councilor at doon na rin sa mga baguhang kandidato, sinabi ng mga ito na makakaasa ang kanilang mga botante na hindi umano masasayang ang botong kanilang ipinagkatiwala sa mga ito.

Mga bagong halal na kandidato sa Malay, iprinoklama na!

Ni Bert Dalida, YES FM Boracay

Pinuno ng masigabong na palakpakan at hiyawan ang loob ng SB Malay Session Hall kahapon ng umaga, ika-14 ng Mayo.

Ito’y matapos iproklama ni mismong COMELEC Malay Chairman Feliciano Barrios Jr. ang mga nanalong kandidato sa bayan ng Malay sa kakatapos lamang na May 13, 2013 Midterm Election.

Pasado alas-5:00 ng umaga nang isa-isang inanunsyo ni Barrios ang mga nanalo na sina Malay Mayor John Yap at Wilbec Gelito na pawang walang katunggali.

Si Yap ay may botong 11, 329 habang si Gelito ay may botong 10, 948.

Samantala, binati naman ng kanyang mga taga-suporta si SB Member Natnat Cawaling-Paderes matapos ihayag ng COMELEC ang kanyang pagiging numero unong SB matapos nitong makakuha ng kabuuang 11, 319 votes.

Sinundan naman ito ni Jupiter Gallenero na may 10, 035 votes, ikatlo si Rowen Aguirre na may 9, 516 votes, pang-apat si Fromy Bautista na may 9,495.

Panglima si Danilo delos Santos na may 8, 659, pang-anim si Leal Gelito na may 8, 554, pangpito si Paterno Sacapaño Jr., at pangwalo si Manuel delos Reyes na may 7,378.

Ilan sa mga sumaksi sa nasabing proklamasyon ay sina dating Vice Mayor Ceceron Cawaling, ilang mga taga-munisipyo ng Malay, at ilan pang taga-lokal na media.

Sunday, May 12, 2013

Kuryente para sa Malay at Boracay, wala ng back-up?

Ni Edzel Mainit, YES FM Boracay

Kung malalampasan na walang brown out sa Aklan ngayong eleksiyon para hindi ma-antala ang halalan sa Lunes, kapag matapos na ang eleksiyon, saan na kukuha ng suplay ng kuryente para sa Boracay?

Ito ay dahil nagtapos na nitong Setyembre 2012 ang kontrata ng Akelco sa isang independent power producer na Panay Power Corporation o PPC  sa Nabas.

Kaya kung magkaproblema ang National Grid Corporation of the Philippines (NGCP) na siyang magsisilbing linya ng kuryente papunta sa Aklan na dini-distribute ng Akelco dito sa buong probinsiya ay magkakaproblema na rin ang isla ng Boracay at maging ang buong bayan ng Malay, dahil wala na ang back-up na ito mula sa Nabas.

Sa panayam kay Engr. Joel Martinez ng Akelco, inihayag nitong wala nang iba pang mapagkukunan ng enerhiya sa Aklan na pwedeng makapag-supply dito sa Boracay.

Kung dati ay sa PPC Nabas umano kumukuha ng supply para sa Boracay kapag brown out ang buong probinsya, ngayon ay wala na umano kaya kaniya-kaniyang generator muna ang mga establishemento dito dahil wala ng back-up.

Pero nilinaw ni Martinez na may sapat na supply ng enerhiya ang Aklan.

Subalit ang pag-aamin nito, ang bayan umano ng Kalibo ay maaarin masuplayan pa rin dahil sa may independent power plant naman na pwedeng mag-produce ng enerhiya na siyang pagkukunan ng Akelco para doon.

Inihayag naman ni Matinez na ang bagay na ito ay batid na rin umano ng mga stakeholders sa Boracay.

Akelco, pinasigurong walang brown out sa araw ng eleksiyon sa Aklan

Ni Edzel Mainit, YES FM Boracay

Walang brown out sa darating na eleksiyon sa araw ng Lunes hanggang sa matapos ang bilangan.

Kaya ang mga bagay na ito ang mariing pinaghahandaan umano ngayon ng Aklan Electric Cooperative o Akelco para masigurong hindi magkakaroon ng problema sa power supply o kuryente na siyang pangunahing kailangan para mapagana ang PCOS machines na gagamitin sa halalan.

Bunsod nito, ayon kay Akelco Engr. Joel Martinez, ikinasa na nilang ang mga contingency plan nila para dito.

Una aniya, ay nag-deploy na sila ng mga linemen sa bawat bayan para ang mga na ito ang aaksiyon sa anumang problema sa kanilang area na may kinalaman sa kanilang serbisyo.

Maliban dito, hiniling na rin umano nila sa National Grid Corporation of the Philippines (NGCP) na magpadala ng kanilang mga tao sa Andagao at Nabas para tumugon sa suliranin may kaugnayan naman sa daloy ng enerhiya sa transmission line ng kumpaniyang ito.

Iyon ay kapag magka-brown-out man ay aasahang ilang minuto lang aniya ito magtatagal dahil maibabalik agad nila, lalo pa at wala namang problema sa supply, maliban na lamang kung ang linya ang sumablay.

Paglilinaw pa ni Martinez, sakaling magka-problema ang NGCP line mula sa pinagkukunan ng enerhiya, sinabi nito na tanging ang bayan lamang ng Kalibo ang makakaya nilang bigyan ng supply ng kuryente at kukunin nila ito mula isang independent producer sa New Washington.

Habang sa ibang lugar naman sa Aklan ay hindi na umano aabutin dahil hindi sasapat ang enerhiyang ito.

Ganoon pa man, pinasiguro ng “action man” ng Akelco na ginagawa nila ang dapat upang hindi magka-brown out sa araw ng eleksiyon sa Lunes.

Mga PCOS machines sa mga polling places sa Malay, 24-oras na babantayan

Ni Edzel Mainit, YES FM Boracay

Simula noong Biyernes, a-10 ng Mayo, ay 24 oras na babantayan na ng mga pulis ang lahat ng polling places sa Malay at Boracay.

Ito ay upang masiguro umano ang kaligtasan ng mga PCOS machines na dinala na sa lahat ng polling precinct dito.

Ayon kay S/Insp. Reynante Jomocan, hepe ng Malay Police Station, simula noong Biyernes hanggang sa matapos ang eleksiyon ay mayroon ng mga nakaantabay ng pulis sa mga polling places dito  gayong din mga tanod umano ng mga barangay.

Nabatid din mula sa opisyal na kahapon ay dumating na rin ang sampung police officers na augment o dagdag pwersa sa awtoridad sa Malay na siyang magbabantay sa darating na halalalan.

Samantala, inihayag ng hepe na sa ngayon ay nananatiling maayos pa rin ang seguridad para sa nalalapit na May 2013 elections sa Lunes. 

Mga PCOS Machine sa buong bayan ng Malay plastado na

Ni Edzel Mainit, YES FM Boracay

Ilang araw pa bagong ang eleksiyon, pero plastado na noong Biyernes pa lang, a-diyes ng Mayo, ang mga PCOS machine sa mga polling places sa buong bayan ng Malay.

Sapagkat noong Biyernes ng umaga pa lang ay inihatid na sa mga polling precinct sa 17 barangay sa bayan na ito ang mga makinaryang gagamitin para sa May 13, 2013 elections para sa araw ng Lunes na halalan.

Sa testing at sealing ng PCOS noong Biyernes ng umaga na ginawa sa bawal presentong pagbobotohan ay nabatid mula sa Malay Comelec Office na wala umano silang nakitang nagka-problema dahil maayos naman umano ang lahat nang subikin kung gumagana ang 35 PCOS machines sa mga barangay sa Malay. 

Dahil sa abala na, Comelec Malay, wala ng oras mag-baklas pa ng mga poster

Ni Edzel Mainit, YES FM Boracay

Ibinalik na naman ang mga poster ng kandidato sa ipinagbabawal na mga lugar ng Comelec.

Ito ang inamin ni Malay Comelec Officer Feliciano Barrios sa panayam dito.

Aniya, nakarating na rin sa kaalaman ng Comelec  ang bagay na ito, kung saan sa mga lugar na binaklasan na ng kumisyon dito sa Boracay ay muling sinabitan na naman umano ng mga poster ng politiko.

Bagay na tila ikina-dismaya ng Comelec Officer ang pangyayaring ito.

Pero dahil sa abala na umano sila ngayon sapagkat sa darating na Lunes na ang eleksiyon ay wala na aniya silang oras pa para mambaklas ng mga poster ngayon.

Matatandaang dalawang linggo pa lang ang nakakalipas ng nambaklas ang Comelec Malay sa pangunguna ni Barrios at kapulisan dito sa Boracay kung saan ang sasakyang van umano na ginamit nila ay halos napuno na ng mga campaign paraphernalia at poster ng kandidato mula sa iba’t ibang bahagi ng islang ito na hindi common poster area. 

“Testing and sealing” ng PCOS machines sa Malay, isinagawa

Ni Edzel Mainit, YES FM Boracay

Noong Huwebes, Mayo a-nuebe ng tanghali ay dumating na lahat ng PCOS Machine na gagamitin para sa buong bayan ng Malay at Boracay.

Pero noong Biyernes dinala ang mga ito sa 17 barangays ng Malay para gamitin sa 2013 Midterm election na magagansap sa araw ng Lunes, Mayo a-13.

Bunsod nito, noong Biyernes din mismo ginawa ang testing at sealing sa lahat mga Precinct Count Optical Scan o PCOS Machines sa pag-dating na mga ito sa mga polling precincts.

Bunsod nito, sinabi ni Malay Comelec Officer Feliciano Barrios na nabigyan na ng pagkakataon ang mga nais makita ang machine.

Maliban dito, may pagkakataon din umano ang sampung botante na masubukan ang aktuwal na pag-gamit sa machine na ito.

Sa bahagi naman ng Comelec, sa gagawing testing and sealing na ito malalaman kung gumagana ng maaayos at kung makapag-transmit ang PCOS upang maging handa sa pagsapit ng eleksiyon.

Maliban dito, mananatili na umano sa mga presento ang machine hanggang sa matapos ang pagboto.

Pero para masiguro umano na ligtas ang machine, ang mga partido o kandidato ay maaari naman aniyang magpadala ng kanilang representante para bantayan ang PCOS maliban pa sa mga Board of Election Inspectors o BEI at pulisya na naroroon.

Samantala, sa ngayon ayon kay Barrios ay nanatiling maayos naman ang kanilang ginagawang paghahanda at wala silang nakikitang magiging problema sa Lunes sa eleksiyon dito bayan ng Malay. 

Mga establishemento sa Boracay, humabol ng aplikasyon para sa exception ng liquor ban

Ni Edzel Mainit, YES FM Boracay

Humabol na umano ang mga establishemento sa Boracay ng pag-a-apply sa Comelec para sa liquor ban exception.

Kung saan noong a-otso ng Mayo, araw ng Miyerkules, ilang oras bago ipatupad ang Comelec  Resolution No. 958 kung saan nakasaad ang guidelines para sa Liquor Ban na naunsiyame din dahil sa binabaan ng Temporary Restraining Order o TRO ng Supreme Court, ay doon pa lamang din nag-sumite ang mga ito ng aplikasyon.

Sa panayam kay Malay Comelec Officer Feliciano Barrios, inihayag nito na sa nasing petsa ay humabol pa ang mga establishemento sa Boracay sa pag-a-apply.

Kaya agad nitong ipinadala ang mga aplikasyon sa Comelec Regional Office na siyang magbibigay ng certificate of exemption.

Kung matatandaan, una nang sinabi ni Atty. Roberto Salazar, Aklan Comelec Supervisor na kung hindi mag-a-apply sa liquor ban exception ang mga establishemento sa Boracay ay mahigpit nilang ipapatupad ang naaayon sa batas.

Ganoon paman, dahil sa ika-12:00 ng madaling araw pa naman sisimulang ipatupad ito hanggang sa ika-13 ng Mayo ng hating gabi ay mistulang hindi pa huli para sa mga establishento sa Boracay ang aplikasyon nila lalo na at ibinalik sa dalawang araw ang implementasyon kaysa sa una ng utos ng Comelec na simulan na sana noong ika-9 ng Mayo.

Samantala, sa panayam kay Barrios, hindi naman nito binanggit kung ilan ang nagsumite at kung anu-anong establishemento ang mga ito. 

Boracay, free sa liquor ban

Ni Edzel Mainit, YES FM Boracay

Hindi man naipatupad ang Liquor Ban noong Miyerkules, Mayo 8, ay natuwa naman ang Comelec dahil may ilang mga establishemento pa rin sa Boracay ang sumunod dito.

Sapagkat ayon sa ginawang monitoring umano ng Comelec Malay sa paraan ng pagdeploy nila ng tao dito sa isla, napansin nila na may mga bar  talaga dito na hindi nag-serve ng alak sa nasabing petsa, at may mga establishementong hindi talaga ng nagbenta ng nakakalasing na inumin partikular na yaong mga hindi nag-apply ng exception sa kumisyon.

Dagdagan pa umano na noong a-otso lang din naglabas ng Temporary Restraining Order o TRO ang Supreme Court oras bago ipatupas sana ang pinalawig na liquor ban bago ang halalan.

Kaya ayon kay Malay Comelec Officer Feliciano Barrios, sa gabi ng a-nuebe ay pwede ulit mag-serve ng alak ang mga establishemento dito.

Nilinaw ni Barrios na ibinalik sa dalawang araw ang pagpapatupad sa liquor ban na magsisimula sa madaling araw ng a-dose ng Mayo at matatapos ito pagkatapos din mismo ng araw ng eleksiyon sa alas-12:00 ng hating gabi ng a-trese ng Mayo.

Kung maaalala, una ng nagpalabas ng Resolution No. 9582 ang Comelec kung saan mula sa dalawang araw na implementasyon nito ay ginawa itong limang araw ng kumisyon.

Subalit ani Barrios, sa petisyon aniya na ipinaabot ng mga liquor company sa Supreme Court, ay nagpalabas ng utos ang kataas-taasang korte na ipatigil ang implementasyon.

Maaalalang nakasaad din sa resolusyon na ito na dapat ay noong a-nuebe ng madaling araw ay dapat na inumpisahan na ang pagpapatupad nito na nagbabawal sa pagbibenta, pabili, pag-serve at pag-inom ng alak.

Maliban na lamang kung ang establishemento ay accredited sa Department of Tourism at nakapag-apply ng excemption sa Comelec.

Pero ang mga turistang dayuhan na gustong uminom ng alak ay hindi bahagi o saklaw ng resolusyon kaya malayang silang maka-inom kahit sa araw ng eleksiyon. 

Ilang bangko sa Boracay, hands off muna sa Money Ban ng Comelec

Ni Christy Dela Torre, YES FM Boracay

Todo-bantay na ngayon ang Commission on Elections sa posibleng gawin ng mga pulitiko partikular na sa vote-buying.

At upang maiwasan umano ang vote buying, naglabas ang Comelec ng Resolution 9688 o Money Ban at kanila itong inamyemdahan.

Kung saan nakapaloob dito na lilimitahan sa Php100,00.00 ang cash withdrawals kada araw.

At sa pakikipanayam ng himpilang ito sa mga manager ng ilang bangko sa isla ng Boracay, sinabi ng mga ito na hangga’t wala umano silang natatanggap na mandato o utos mula sa governing body ng mga bangko, ay papayagan nilang magwithdraw ang sinuman ng nasabing halaga.

Mahirap umano kasi sa kanila na hindi pag-withdraw-hin ng pera ang kanilang mga kliyente, dahil lamang sa naturang panukala ng Comelec.

Iginiit pa ng mga ito na pera din umano nila ‘yun, at hindi rin naman umano nila alam kung saan gagamitin ang inilabas na pera.

Kailangan din umanong maglabas ng parameter ang Comelec o governing body nang sa ganun, kung sakali mang may magreklamo ay mayroon silang ipapakitang guidelines at maipaliwanag ng mabuti sa kliyente.

Pero kung sakali anilang mabigyan sila ng order mula sa pamunuan ng mga bangko na huwag magpalabas at huwag payagan ang sinuman na kumuha ng ganung halaga ay kanila itong susundin.