YES THE BEST 911 BORACAY

Friday, June 14, 2013

Boracay, di dapat mabahala sa mga sakit na nakukuha sa tubig ngayong tag-ulan

Ni Kate Panaligan at Malbert Dalida, YES FM at Easy Rock Boracay

Hindi umano dapat mabahala ang publiko sa Boracay kaugnay sa mga sakit na nakukuha sa tubig ngayong tag-ulan.

Ayon kay Malay Sanitation Inspector III Babylyn Frondoza, ang Boracay Tubig at Boracay Island Water Company na siyang pinagkukunang tubig ng mga taga Boracay ay regular namang nagsasagawa ng check-up.

Maliban dito, kampante rin umano sila kahit pa ngayong tag-ulan, dahil hindi rin gumagamit ng tubig mula sa mga balon o deep well ang mga residente sa isla.

Magkaganoon pa man, nanatili umano silang vigilante para sa mga taga-Mainland Malay dahil karamihan sa mga ito doon ay sa mga balon pa rin kumukuha ng tubig.

Ang diarrhea, cholera, typhoid fever, amebiasis, ay ang mga sakit na kadalasang nakukuha mula sa tubig tuwing tag-ulan.

Proyektong korales ng BFI sa isla, naging maganda ang resulta

Ni Christy Dela Torre, YES FM Boracay

Gumaganda na ang tubo ng mga reef corals sa isla ng Boracay.

Ito ang may pagmamalaking inihayag kahapon ni Boracay Foundation Incorporated President Dionisio Salme, kaugnay sa dalawang taon na nilang proyekto.

Kung saan kaagapay umano nila sa pangangalaga at mahigpit na pagmomonitor ay ang mga taga bantay dagat, BFI Marine Biologist, LGU Malay at ang Municipal Agriculture’s Office o MAO.

Ayon pa kay Salme, upang lalong dumami ang mga korales ay may tinatawag silang nursery kung saan doon nila ito itinatanim.

Kung tumubo na ay kanila itong nililipat at ipapalit sa mga korales na nasira na.

Maging ang mga boatman umano ay nabigyan din ng instruksyon kung saan nila pwedeng ihagis ang kanilang mga angkla upang hindi matamaan at masira ang mga korales.

Bukod dito, dalawang linggo na aniya ang nakaraan nang pumunta ang grupo ng LGU at Marine Biologist ng BFI sa UP MSI o Marine Science Institute, para magkaroon ng sapat na kaalaman ukol sa pagpapalago ng mga korales na ito sa isla.

Nabatid na ang positibong resulta ng proyekto ng BFI ay taliwas naman sa hindi magandang nangyayari ngayon sa iba pang coral reef project sa isla.

Comelec Aklan, naging abala sa huling araw ng pangtanggap ng statement of expenditures ng mga tumakbong kandidato

Ni Jay-ar Arante, YES FM Boracay

Naging abala kahapon ang Comelec Aklan sa pagtanggap ng mga isinumiting statement of expenditures ng mga kumandidato nitong nakaraang midterm elections.

Ayon kay Kalibo Acting Comelec Chairman Getulio M. Esto, marami umano sa mga kandidatong ito ang nagsumite ng kanilang statement of expenditures o kabuuang mga ginastos noong panahon ng pangangampanya.

Ngunit hindi rin umano naging madali para sa mga kandidato ang anim na pirasong papel na kanilang pipil-apan, dahil maaari itong maimbalido at hindi rin tanggapin ng Comelec.

Dagdag pa na kailangan din nilang humabol sa pila, dahil sarado na ang order ng Comelec sa ibinigay nilang tatlumpung araw.

Dahil dito, mumultahan umano at maaaring hindi makakaupo sa pwesto ang sinumang kandidatong hindi sumunod sa nasabing batas.

Nabatid na sa darating na Hunyo a-trenta naman gaganapin ang oath taking ng mga nanalong kandidato at sisimulang manunungkulan sa mga mamamayan sa Hulyo a uno.

Thursday, June 13, 2013

Boracay Water, kinilala sa kauna-unahang Boracay Day


Kinilala kamakailan ng Munisipalidad ng Malay ang Boracay Water, ang namamahala sa tubig at nagamit na tubig sa Boracay, sa nagdaang Inaugural Day ng Boracay, para sa mahalagang kontribusyon ng kumpanya sa pagtataguyod ng pagpapanatili ng kapaligiran ng nasabing Isla, lalo na sa pagiging kampeon nito sa larangang ng tubig at nagamit na tubig sa Boracay Beach Management Program (BBMP) ng Malay. Isa ang Boracay Water sa apat na pribadong mga kumpanyang kinilala sa nasabing selebrasyon, kasama ang San Miguel Corporation, Boracay Foundation, Inc., at ang Petron Foundation Inc.
 
Ang BBMP ay inilunsad ng Lokal na Pamahalaan ng Malay noong taong 2010 upang pagsama-samahin ang lahat ng Environment Champions na magtutulong-tulong upang planuhin at isakatuparan ang mga proyektong magpapanatili ng ganda ng Isla ng Boracay. Ang Boracay Water ay isa din sa mga pinaka-aktibong taga-suporta ng mga aktibidad na kaugnay ng kauna-unahang Boracay Day sa pamamagitan ng pagbibigay ng libreng tubig sa mga kasapi ng Flores De Mayo sa Boracay at sa pagsuporta sa Pot Session Program, isang aktibidad na naglalayong makapag-prodyus ng mga binhi na maaring magamit para sa rehabilitasyon ng Nabaoy Watershed.
 
Ang Boracay Water ay isa sa tatling subsidiaries ng Manila Water, ang konsesyunaryo sa tubig ng Silangang bahagi ng Metro Manila, na nabuo noong taong 2009 sa pamamagitan ng isang joint venture agreement kasama ang Tourism Infrastructure Authority and Enterprise Zone Authority or TIEZA (noon ay Philippine Tourism Authority) upang mamahala ng tubig at nagamit na tubig sa Isla ng Boracay, Malay, Aklan, partikular na sa tatlong mga barangay nito na Manoc-Manoc, Balabag, at Yapak.

Aklan Governor Carlito Marquez, nagpatawag ng special meeting para sa Task Force Bantay Boracay

Ni Malbert Dalida, YES FM Boracay 

Isang special meeting para sa Task Force Bantay Boracay ang ipinatawag ngayon ni Aklan Governor Carlito Marquez.

Ito ang kinumpirma mismo ni Task Force Bantay Boracay member Liberty Wacan mula sa kanilang provincial office.

Nabatid na nakatakdang pag-usapan sa nasabing pagpupulong ay ang update report ng Philippine Coastguard kaugnay sa Maritime Industry o MARINA Authority Laws and Rules, implementasyon ng “One Entry-One Exit Policy”, at iligal na pagkakarga ng pasahero sa Station 1 at 3 ng mga bangkang bumibiyahe papuntang Romblon.

Tampok din sa pagpupulong mamaya ay update report ng BIWC o Boracay Island Water Company, at ang mainit na usapin kaugnay sa demolition ng mga illegal structures sa 25+5-meter buffer zone ng Boracay.

Kasalukuyang ginaganap ang special meeting sa Provincial Governor’s Office sa bayan ng Kalibo, Aklan na nag-umpisa kaninang alas-2:00 ng hapon.

Ilan sa mga miyembro ng nasabing Task Force ay ang Provincial Tourism Council, MARINA regional office, CENRO DENR, Philippine National Police, Philippine Coast Guard, LGU Malay at iba pa.

APPO, nakapagtala ng 42 lumabag sa Comelec gun ban

Ni Jay-ar Arante, YES FM Boracay

Nakapagtala ang APPO o Aklan Police Provincial Office ng 42 mga nahulihan ng armas sa ipinatupad na Comelec Gun Ban.

Kasunod ito ng pagtatapos ng apat na buwang election gun bun na ipinatupad ng Comelec para sa kakatapos na eleksyon.

Ayon kay APPO Public Information Officer PO3 Nida Gregas, ilan umano sa mga nahulihan nila ay ang mga security guards at mga civilian.

Dagdag pa nito, mas marami umano ang mga lumabag sa nasabing gun ban ngayon, kaysa noong 2010 elections.

Samantala, ayon pa kay Gregas, itutuloy pa rin nila ang “Oplan Katok”upang palakasin ang pagsugpo sa krimen, kahit tapos na ang gun ban.

Kung maaalala, nagsimulang ipatupad ang gun ban noong Enero a-13 at nagtapos alas-11:59 kagabi.

Seedling production activity at Family Day ng LGU Malay, tagumpay na naidaos kahapon

Ni Jay-ar Arante, YES FM Boracay

Tagumpay na naidaos kahapon ang programa ng LGU Malay kasabay sa pagdiriwang araw ng kalayaan o Independence Day.

Bilang isa sa mga dumalo sa nasabing programa, sinabi ni DOT Officer in Charge Tim Ticar na naging maayos ang kanilang seedling production activity sa Barangay Nabaoy na nagsimula bandang alas-8:00 ng umaga hanggang alas-3:00 kahapon ng hapon.

Layunin umano ng programang ito na mapangalagaan at maprotektahan ang kalikasan sa Bayan ng Malay, na may kaugnayan din sa pagdiriwang ng ika-64 na anibersaryo ng Malay sa darating na Biyernes.

Pinangunahan naman ni mismong Malay Mayor John Yap ang nasabing aktibidad kasama ang ilang opisyales at mga department heads ng nasabing bayan.

Samantala, sa darating na Hunyo a-15, araw ng Biyernes, ay ipagdidiriwang naman ang 64th Foundation Day ng Malay, na inaasahang magiging makulay dahil sa ibat-ibang programa.

Resulta ng artificial coral reefs project sa Boracay, ikinadismaya ng MAO

Ni Jay-ar Arante, YES FM Boracay

Dismayado ngayon ang Malay Agriculture Office (MAO) sa resulta ng artificial coral reef project sa Boracay.

Ayon kay Malay Coastal Resource Management Program-In charge Jan Balquin, sa loob ng ilang buwan na inaasahang dapat tubuan na ang mga ito ng mga bagong korales ay wala umanong tumubong mga coral buds sa artificial coral reefs at coral domes, at lumot lang ang tumubo sa mga ito, na naging dahilan kung bakit kanilang ikinadismaya ang resulta ng nasabing proyekto.

Ito ang nabatid matapos iprinisinta kahapon ng MAO ang estado ng nasabing proyekto sa session ng SB Malay.

Kaugnay nito, sinabi ni SB member Esel Flores na handa naman ang LGU Malay sakaling makapag-hanap sila ng ekspertong susuri sa mga nasabing artificial reefs.

Nagkasundo naman ang konseho na kinakailangan nang magpadala ng sulat kay Sen. Loren Legarda na siyang donate ng P50-M para sa nasabing proyekto.

Anila, panahon na rin umanong malaman nito ang naging resulta ng pagpapatubo ng artificial reef sa karagatang nakapalibot sa isla ng Boracay.

Ilang grupo ng mga motorista sa Boracay, humarurot sa pagdiriwang ng Independence Day

Ni Malbert Dalida, YES FM Boracay

Tatlong taon na ang nakalilipas nang muling humarurot kahapon ng hapon ang ilang grupo ng mga motorista sa Boracay sa pagdiriwang ng Philippine Independence Day.

Nagkasundong magkita-kita sa kanilang assembly area sa Ati Village sa Tulubhan Manoc-manoc, ang may humigit-kumulang 100 miyembro ng PhilBikers Neutralizers at Islanders Boracay.

Alas-4:00 kahapon nang simulan nilang ikutin ang Boracay, mula sa Manoc-manoc, Balabag at Yapak sa pamamagitan ng isang motorcade.

Ayon kay Islanders Boracay Board Member Alan Palma Sr., layunin umano ng kanilang adbokasiya na ipakita, ibahagi at ipaalala sa publiko ang pagiging responsabling mga motorista sa isla.

Samantala, isang boodle fight naman ang inihanda ng mga nasabing grupo, bilang pagtatapos ng kanilang aktibidad kaugnay sa pagdiriwang ng araw ng kalayaan.

Wednesday, June 12, 2013

Sewer project ng BIWC sa Bolabog, target na matapos sa buwan ng Hulyo

Ni Alan Palma Sr., YES FM Boracay


Matatapos na ang sewer line na bahagi ng waste water network expansion ng Boracay Water Company (BIWC) sa Bolabog sa susunod na buwan ng Hulyo.

Ito ang tugon ni BIWC Customer Service Officer Acs Aldaba, kaugnay sa dulot na abala ng proyekto sa mga residente at estudyante ng Boracay National High School lalo na at panahon na ng tag-ulan.

Bagamat inamin ni Aldaba na ang proyekto ay nagdudulot ng hindi kanais-nais na sitwasyon sa nabanggit na lugar, sinabi nito na ang pagkakaroon ng sewer line ay makakatulong para maibsan ang mga pagbaha at pag-ipon ng tubig sa loob ng paaralan na matagal na ring suliranin.


Ang pagkonekta ng mga kabahayan sa sewer line at pag-monitor sa mga illegal connection ay ilan sa mga hakbang na tumatalima sa kanilang proyekto na makakatulong sa pangangalaga sa kapaligiran.

Wala rin umano silang nakikitang panganib dahil sinisiguro ng contractor na hindi sila mag-iiwan ng open-excavation na maaring magdulot ng sakuna.

Samantala, humingi rin ng paumanhin at pag-iintindi ang BIWC sa publiko sa dulot na abala sa kalsada ng Bolabog, at pipiliting matapos ito sa buwan ng Hulyo.

Ang proyekto na ito ng BIWC ay bahagi ng kanilang expansion para sa sewer o wastewater network para na rin sa lumulubong turistang bumubisita sa isla ng Boracay.


Pagransak sa principal’s office ng Lamberto Tirol National High School sa Yapak, kahapon, may suspek na

Ni Malbert Dalida, YES FM Boracay

May suspek na sa pagransak kahapon sa principal’s office ng Lamberto Tirol National High School sa Yapak, Boracay.

Sa nakalap na imbistigasyon ni PO3 Ariel Naral ng Boracay PNP, estudyante umano ang itinuturong suspek ng mismong eskwelahan, na pumasok sa opisina ng punong guro.

Sa pakikipag-ugnayan naman ng himpilang ito kay Head Teacher Val Casimero, pinasok umano ng suspek ang kanyang opisina sa pamamagitan ng pagsira sa aircon doon.

At dahil sa butas na dinaanan ng suspek, sinabi din ni Casimero na isang bata ang suspek.

Samantala, kaagad din umano itong nagreport sa mga pulis nang matuklasang niransak na pala ang nasabing kuwarto.

Bukas ang mga cabinet at ninanakaw umano ang lap top na bigay ng munisipyo ng Malay.

Maliban sa lap top, wala na rin umanong iba pang ninakaw sa loob ng nasabing opisina.

Ayon pa kay Casimero, maging ang opisina ng punong barangay ng Yapak ay gumawa na rin ng hakbang tungkol sa nasabing insidente.

Kumpanya ng fast craft na bumabiyahe sa isla ng Boracay, pai-imbestigahan ng LGU Malay

Ni Jay-ar Arante, YES FM Boracay

Nakatakdang pa-imbestigahan ng Local Government Unit (LGU) Malay ang kumpanya ng fast craft na Oyster Ferry na bumabiyahe dito sa isla ng Boracay.

Ayon kay Sangguniang Bayan ng Malay member at chairman on environmental protection Dante Pagsuguiron, patuloy ang kanilang pagmomonitor sa nasabing bangka na inirereklamo sa ngayon dahil sa pagtatapon ng kanilang sea waste sa karagatan ng Boracay na mahigpit na ipinagbabawal.

Tinalakay kahapon sa 16th SB Session ng Malay ang nasabing usapin na nauna nang ipinaabot ni SB Member Jupiter Gallenero, kung saan may mga natanggap siyang reklamo mula sa mga dispatchers din ng mga bangka na nakakita sa nasabing insidente noong nakaraang linggo.

Nagkaroon naman ng pagkakataon na makakuha ng ebidensya si Pagsuguiron, kung saan isang larawan ang ipinakita nito kahapon sa session bilang patunay na nagtatapon nga sila ng kanilang sea waste sa dagat.

Sa ngayon, patuloy ang kanilang pag-iimbestiga sa nasabing fast craft at magkakaroon sila ng kaukulang inspeksyon lalo pa at may ilang mga nakapagsabing diretso lamang sa dagat ang dumi ng mga pasahero.

Samantala, una nang sinabi ni Boracay DOT Officer in Charge Tim Ticar, na iimbestigahan din nila ang nabanggit na fast craft dahil sa nakakasira ito sa turismo ng isla ng Boracay at sa oras na mapatunayan din nila na lumabag sila sa nasabing batas ay magbibigay sila ng kaukulang parusa laban dito.

Pagkakaroon ng zoo sa Boracay, welcome sa DOT Boracay

Ni Peach Ledesma, YES FM Boracay

Isang “welcome development” ang pagkakaroon ng isang zoo dito sa Boracay.

Ayon kay Department of Tourism officer in charge Tim Ticar, isang magandang idea ang pagkakaroon ng zoo dito sa isla dahil magiging dagdag na atraksyon ito sa mga turistang dumadayo dito.

Paborable din ito bilang dagdag na activity para sa mga bisita.

Pero dapat ay nasa tamang standard pa rin ang pag-aalaga sa mga hayop na ibibida sa isang zoo.

Dapat ay naaaalagaan din umano ng mabuti ang mga hayop at siguraduhin kung nasa listahan ba ito ng mga endangered species.

Dapat ay naha-handle din ng maayos ang mga hayop at marunong ang handler ng mga ito.

Ito ay para na rin sa kaligtasan at seguridad ng mga turista.

Ang nasabing usapin ay may kinalaman sa kumakalat na usap-usapan sa mga social networking sites na mayroon umanong nag-o-operate na zoo dito sa isla ng Boracay kung saan mayroong makikitang leon, tigre, at isang klase ng ahas.

Maaari pa umanong kunan ng litrato ng mga turista ang mga hayop na ito.

Puka Beach sa isla ng Boracay naging kontrobersyal sa sesyon ng SB Malay

Ni Jay-ar Arante, YES FM Boracay

Naging kontrobersyal ngayon ang pagkakapasok ng Puka Beach ng isla ng Boracay sa 100 Best Beach in the World survey ng CNN travel website.

Sa sesyon kasi ng SB Malay kahapon ng umaga, binuksan ni SB Member Jonathan Cabrera ang usapan kaugnay sa pagdaong ng isang malaking barge sa nasabing lugar.

Sa privilege hour ng sesyon kahapon ay ipinaabot nito ang kanyang saloobin, kung bakit sa kabila ng pagkilala sa Puka Beach na tahimik na lugar sa Boracay ay dinaungan lamang ito ng isang malaking barge.

Kaugnay nito, kinuwestiyon din ni Cabrera kung bakit at papaanong basta na lamang pinapayagan ang mga malalaking barge.

Samantala, sa kalagitnaan ng usapin ay minarapat namang magsuhestiyon ni SB member Wilbec Gelito na i-review o repasuhing muli ang kanilang mga ordinansa tungkol dito, lalo pa’t nabuksan din ang tungkol sa mga special permit.

DOT Regional Director Atty. Helen Catalbas, dumating sa Boracay para sa isang press conference

Ni Malbert Dalida, YES FM Boracay

Dumating kahapon sa Boracay si DOT Regional Director Atty. Helen Catalbas para sa isang luncheon press conference sa Biyernes.

Ayon kay Boracay DOT officer in charge Tim Ticar, sasagutin ni Catalbas sa nasabing presscon ang iba’t-ibang katanungan kaugnay sa mga isyu sa Boracay.

Bagama’t aminado si Ticar na maging siya ay walang ideya kung anong partikular na concern ang pakay ni Catalbas, naniniwala umano ito na ang pagdating ng nasabing director ay may kinalaman din sa mga environment related issues sa isla.

Mismong si Atty. Catalbas din umano ang spokesperson para sa Regional Technical Working Group na binuo ni Pangulong Benigno “PNoy” Aquino III para sa Baguio at Boracay.

Samantala, nabatid na inatasan ni Pangulong Aquino ang mga miyembro ng technical working group para sa komprehensibong plano upang mapangalagaan ang tinaguriang assets ng bansa katulad ng Baguio at Boracay.

Ang technical working group na ito ay kinabibilangan ng DOT, DENR, DILG at Local Government ng Malay.

Kaugnay nito, isang press conference na pangungunahan ng DOT Region 6 ang gaganapin sa darating na Biyernes sa isang resort sa Boracay.

Tuesday, June 11, 2013

Boracay PNP, nakatanggap ng panibagong patrol car mula sa APPO

Ni Jay-ar Arante, YES FM Boracay

Nakatanggap ng panibagong patrol car ang Boracay Tourist Assistant Center (BTAC) mula sa Aklan Police Provincial Office (APPO) kahapon ng umaga.

Ayon kay Police Community Relations Officer PO3 Cristopher Mendoza, ibinigay ang nasabing sasakyan ng APPO para makadagdag sa nasabing service ng mga pulisya sa isla ng Boracay at para narin sa mabilisang pagrespondi sakaling may mga naganap na komosyon sa Boracay.

Nabatid na ang pagbibigay sa nasabing sasakyan ay ginanap kahapon ng umaga, June 10, 2013, sa Balabag Barangay Plaza kung saan nagkaroon ng maikling programa.

Dinaluhan naman ito ng mga taga-Boracay PNP para sa pormal na pagtanggap ng kanilang panibagong sasakyan.

Kaugnay naman nito, nagbigay din ng fire truck ang ilang mga pribadong sektor sa Boracay Action Group bilang karagdagang pagserbisyo.

Samantala, benidisyunan naman ni Rev. Fr. Arnold Crisostomo, ng Holy Rosary Parish Church sa Balabag ang mga nasabing sasakyan.

Nag-island hopping na mga Chinese national sa Boracay, nag-panic matapos masiraan ang sinasakyang bangka

Ni Jay-ar Arante, YES FM Boracay

Minarapat ng walong Chinese national na nag-a-island hopping kahapon ang mag-report sa Boracay PNP, matapos masiraan ang bangkang sinasakyan.

Ayon sa report, pabalik na sila mula sa pag-a-island hopping nang mawalan umano ng balanse ang bangka at masiraan.

Pinasok din umano ito ng tubig kung kaya’t nabasa ang kanilang mga gamit lalo na ang kanilang mga gadgets.

Wala namang naiulat na nasaktan sa nasabing insidente.

Swedish national na nagwala sa Boracay, nanuntok, nanipa, at nangagat ng pulis!

Ni Bert Dalida, YES FM Boracay

“Direct assault, resistance and disobedience upon person in authority.”

Ito ang kasong kakaharapin ng isang Swedish national na nagwala sa barangay Balabag kahapon ng madaling araw.

Sa report ng Boracay PNP, nakilala ang suspek na si Peter Khil, sa legal na edad at pansamantalang umuuwi sa barangay Manoc-manoc.

Sinasabing isang komosyon ang nirespondehan ng mga taga-Boracay PNP kung saan sangkot ang suspek.

Nang dalhin na umano ito sa ospital upang ipagamot ay patuloy pa rin nitong nagwawala at nakikipag-away sa kanyang katunggali.

Maging ang mga rumesponding pulis Boracay ay kanya pang pinagsusuntok, pinagsisipa at kinagat.

Nabatid na ang nasabing suspek ay may pending case dahil sa paglabag sa R.A 9262 o "Anti-Violence Against Women and Their Children Act of 2004".

Pansamantala naman itong ikinustodiya ng Boracay PNP at inihahanda ang kasong isasampa sa kanya.

Mga mag-aaplay ng building permit kailangang may construction plan --- DOLE

Ni Jay-ar Arante, YES FM Boracay

Atensyon sa mga contractors na planong mag-aply ng building permit sa LGU Malay!

Dapat pala ay dadaan muna kayo sa Department of Labor and Employment (DOLE) at magpakita ng inyong construction plan.

Sa pakikipanayam ng himpilang ito kay DOLE Aklan Head Vidiolo Salvacion, sinabi nito na hindi dapat mag-issue ng building permit ang LGU kung walang construction plan.

Ang construction plan umano ay para din naman sa kapakanan at kaligtasan ng mga manggagawa.

Kaugnay nito, iginiit ng DOLE na requirement talaga para sa mga contructors ang nasabing construction plan.

Samantala, sinabi din ni Salvacion na nitong nagdaang taon ay nagbigay na sila ng oryentasyon sa mga taga-LGU building officers kaugnay dito, subalit hindi na umano nasusunod.

Monday, June 10, 2013

Honorarium ng mga gurong nagsilbi noong nakaraang eleksyon, wala pa rin

Ni Jay-ar Arante, YES FM Boracay

Dismayado pa rin ang ilan sa mga mga guro ngayon sa probinsya ng Aklan sa nagdaang eleksyon na nagsilbi bilang mga Board of Election Inspectors (BEIs).

Halos isang buwan na matapos kasi ang halalan ay hindi pa rin daw nila natatanggap ang kanilang mga honorarium.

Ayon kay Kalibo Acting Comelec Chairman Getulio M. Esto, nasa payroll na rin umano ang honoraria ng mga guro ngayon sa opisina ng Comelec at maaari na ring maibigay sa kanila.

Makukuha umano nila ang kanilang mga sahod sa kanilang munisipyo kung saan sila nagsilbi bilang BEIs.

Ayon pa sa Comelec Aklan, natagalan ang pagbibigay ng sahod sa mga guro dahil sa dami ng kanilang mga inaasikaso at sa dami ng problemang kinakaharap ng Comelec ngayon.

Samantala, iisa lamang ang probinsya ng Aklan sa napakaraming lugar sa bansa na hindi pa nabibigyan ng nasabing honorarium hanggang sa ngayon.

WCPD Boracay, hands off muna kaugnay sa pagbabago ng Juvenile Justice Law

Ni Mark Anthony Pajarillo, YES FM Boracay

Hands off muna ang Women and Children Protection Desk (WCPD) Boracay kaugnay sa pagbabago ng Juvenile Justice Law.

Sa pakikipag-ugnayan ng himpilang ito kay WCPD Chief SPO1 Lyn Ibañez ng Boracay Tourist Assistance Center, sinabi nito na hindi pa umano siya makapagbibigay ng reaksyon o kumento hinggil sa nasabing panukalang batas hangga’t hindi pa naaaprubahan.

Dagdag pa nito, wala pa umano siyang ideya kung ano ang mga karagdagan o bago sa batas tungkol sa Republic Act 9344 o ang Juvenile Justice and Welfare Act of 2006.

Dito kasi sa isla ng Boracay ay maraming mga minor de edad ang napaulat na nasasangkot sa mga paglabag sa batas.

Hindi rin lingid sa kaalaman ng lahat na ang isla ng Boracay ay nabiktima ng mga batang ito.

Subali’t maging sila umano sa Boracay PNP partikular na ang WCPD ay aminadong nahihirapan kapag paulit-ulit na ang mga bata ay nasasangkot sa mga nakawan, bagansya o pagala-gala at pamamalimos.

Sa halip ay kanila na itong ipinagkakatiwala sa DSWD o Department of Social Welfare and Develpoment, dahil hindi naman nila basta-basta na lamang pwedeng kasuhan ang mga ito.

Samantala, niratipikahan nitong nagdaang linggo ang House Bill 6052 o An Act Strengthening the Juvenile Justice System in the Philippines, na siya namang nag-amyenda sa Republic Act 9344 o Juvenile Justice and Welfare Act of 2006.

Sa Juvenile Justice and Welfare Act of 2006 naman nakasaad na ang mga kriminal na diyes y otso anyos lamang ang mga pwedeng kasuhan.

Kapag tuluyan nang naging batas, ay maaari nang sampahan ng kaso ang mga edad 15-anyos na mga kabataang kriminal mula sa umiiral na 18-anyos pataas.

Sunday, June 09, 2013

Kaso sa pagpatay sa Ati Leader na si Dexter Condez nakalutang pa rin

Ni Jay-ar Arante, YES FM Boracay

Nakalutang pa rin sa ngayon ang kasong pagpatay sa Ati leader na si  Dexter Condez.

Ayon kay Rev. Father Nonoy Crisostomo ng Holy Rosary Parish Boracay, hinintay na lamang nilang maisampa ang kaso sa korte, kung mapatunayang may probable cause laban sa suspek na si Daniel Celestino.

Kasabay nito ay ang desisyon ng provincial office ng Aklan para sa pagpapatakbo ng nasabing kaso.

Matatandaang nangyari ang pagpatay sa Ati Youth Leader Spokesman na si Dexter Condez noong Pebrero 22 ng kasalukuyang taon, habang naglalakad ito pauwi sa kanilang Village sa Sitio Lugutan, Manoc-manoc Boracay.

Pinaniniwalaang may kaugnayan sa lupa ang pagpaslang sa nasabing biktima.

Samantala, tumanggi munang magbigay ng pahayag si Crisostomo, kaugnay sa Cease and Desist Order na ibinaba ni Judge Elmo del Rosario ng Regional Trial Court RTC Branch 5 sa Kalibo, Aklan sa mga taga Ati community kamakailan lang.

Top Ten Taxpayers ng Malay, paparangalan na ngayong buwan

Ni Jay-ar Arante, YES FM Boracay

Paparangalan na ang sampung Top Taxpayers sa bayan ng Malay sa susunod na linggo sa araw ng Sabado.

Ayon kay Malay SB Secretary Concordia Alcantara, isasabay ang nasabing pagbibigay parangal sa mga top taxpayer sa mismong selebrasyon ng ika-64 na anibersaryo ng bayan ng Malay.

Aniya, ito’y taon-taon nilang aktibidad upang mabigyang parangal ang mga stakeholders lalo na sa isla ng Boracay na isa sa mga sentro ng ekonomiya.

Dagdag pa ni Alcantara, inaasahan nila na lahat ng mabibigyan sa nasabing parangal ay ang mga resorts sa isla, kung saan kumikita ng malaki at sakto ang ibinabayad na tax.

Kasabay naman umano nito, magbibigay din sila ng award sa mga Young Malaynon Achiever kung saan pangalawang taon palang nila itong ginagawa.

Ang nasabing Young Malaynon Achiever ay isang halimbawa ng mga kabataan na kung saan nakapagbigay karangalan sa bayan ng Malay at sa kanilang sarili sa pamamagitan nang nakapasa sa anumang mga pagsusulit katulad ng mga Board at BAR examinations.

Ika-64th Foundation Anniversary ng bayan ng Malay ipagdidiriwang sa Hunyo 15

Ni Jay-ar Arante, YES FM Boracay

Ipagdiriwang na sa susunod na linggo ang selebrasyon ng ika-64 na kaarawan ng munisipalidad ng Malay.

Ayon kay Malay Tourism Officer Felix Delos Santos, magkakaroon ng ibat-ibang aktibidad ang Local Government Unit ng Malay (LGU) sa ika-12, 14 hanggang sa mismong araw ng Malay Day sa Hunyo a-15.

Ilan umano sa mga aktibidad ay ang pagkakaroon ng Environmental Program sa Hunyo a-12 kung saan lahat ng municipal employees ay kasali sa seedling at polling activities na isinabay naman sa pagdiriwang ng bansa ng Independence Day.

Aniya, mayroon din silang marathon and cycling by transportation unit sa Malay sa Hunyo katorse at pagbibigay parangal sa sampung outstanding tax payers sa bayan ng Malay.

Samantala, sa mismong araw naman sa Hunyo a-15 ay magkakaroon ng misa na susundan naman ng parada at maikling programa.

Magkakaroon din ng mga palaro sa hapon at pagsapit ng gabi ay mayroong grand binayle para sa mga Malaynon.

Inaasahan naman na magiging makulay at masaya ang nasabing selebrasyon dahil sa mga programang inihanda ng LGU.

Malay PESO office, magkakaroon ng Job Fair sa Hunyo 14

Ni Jay-ar Arante, YES FM Boracay

Atensyon sa lahat ng mga naghahanap ng trabaho sa bayan ng Malay!

Ang PESO o Public Employment Service office sa bayan ng Malay ay magkakaroon ng Job Pair sa darating na Hunyo katorse taong kasalukuyan.

Ayon kay Malay PESO officer Dennis Briones, taun-taon umano nilang isinasagawa ang nasabing programa, para makapagbigay ng opurtunidad sa mga Malaynon na naghahanap ng trabaho.

Magsisimula ang nasabing Job Fair bandang alas-nuebe ng umaga hanggang alas kwatro ng hapon sa Malay covered court, kaugnay sa pagdiriwang ng anibersaryo ng Malay.

Ayon pa kay Briones, pweding magtungo ang sino mang interesado sa job fair, lalo na ang mga Malaynon.

Pinaalalahanan naman nito ang mga mag-aaply na magdala ng maraming mga resume para magkaroon ng malaking chance na makapasok agad sa mga posible nilang mapagtrabahuhan lalo na sa isla ng Boracay.