Aklan-Congressman Elect Marquez tinanggap ang paanyaya ni Mayor Lachica kaugnay sa Congressional District Office

Posted June 9, 2016

Ni Jay-ar M. Arante, YES FM Boracay

Sa Magsaysay Park building muna pansamantalang ilalagay ang Congressional District Office ni Aklan-Representative Elect Carlito Marquez.

Ito’y matapos tanggapin ng Congressman ang paanyayang ito ni Kalibo Mayor William Lachica, matapos na hindi pinagbigyan ni Governor Florencio Miraflores ang kahilingan ni Marquez na maglaan ng opisina sa loob mismo ng Kapitolyo dahil sa wala na umanong bakanteng lugar doon.

Napag-alaman na noong gobernador pa lamang si Marquez ay naglagay ito ng Congressional District Office sa mismong Provincial Capitol sa loob ng siyam taon kung saan si Miraflores pa noon ang Congressman hanggang sa naipasa ito kay outgoing Representative Teodorico Haresco.

Kaugnay nito nag-hihintay parin umano ngayon ng kasagutan si Marquez sa magiging desisyon ng gobernador para sa kanyang hinahangad na opisina sa kapitolyo.

Samantala, hiling ni Marquez na magtulungan na lamang umano dahil sa tapos na aniya ang politika at ito umano ang hinahanap at makakabuti para sa mga Aklanon.