YES THE BEST 911 BORACAY

Saturday, October 08, 2016

Problemang natatanggap sa nakaraan at kasalukuyang administrasyon, walang pinag-kaiba- Mayor Cawaling

Posted October 8, 2016
Ni Inna Carol L. Zambrona, YES FM Boracay


“Wala umanong pinag-kaiba ang problemang natatanggap sa nakaraang Administrasyon sa kasalukuyan”

Ito ang sinabi ni Malay Mayor Ceciron Cawaling sa himpilang ito kaugnay sa kanyang panayam sa unang isang daang araw na pag-upo bilang nagbabalik na alkalde ng bayan ng Malay.

Isinalaysay ni Mayor Cawaling ang mga pagbabagong gagawin niya sa mga proyektong kanyang ipagpapatuloy at sisimulan palang.

Isa umano sa kanyang pinagtutuunan ng pansin ngayon ay ang Solid Waste Management partikular na ang problema sa mga basura na siyang kinakaharap ngayon ng Boracay.

Nabatid kasi, na maraming natatanggap na reklamo ang Solid Waste Management dahil umano sa mga basurang hindi nahahakot at na si-segregate kung kaya’t nakatambak na lamang ito dahilan na bumabaho.

Ayon kay Cawaling, gagawin niyang centralized ang MRF kung saan dapat umano i-segregate ang lahat ng mga basura ng sa gayon ay maging maayos at hindi narin mahirapan ang mga basurero sa paghakot nito.

Habang inaantay pa umano ang limang garbage truck na binili ng LGU, pansamantalang ginagamit ngayon ang apat na dump truck ng Provincial Government para mapabilis umano ang paghakot ng basura.

Sa ibang usapin naman, pinulong ni Cawaling ang Municipal Peace and Order Council upang tulong-tulong na mapag-usapan kung paano mapanatili ang kaayusan at seguridad sa isla at sa bayan ng Malay.

Samantala, magkakaroon naman ng Memorandum of Agreement (MOA) signing ang LGU-Malay at Boracay PNP, may kinalaman naman sa ipinapatupad na curfew sa mga kabataan kung saan may kaugnayan rin ito sa kampanya laban sa iligal na droga ng administrasyong Duterte.

Boarding House, niluoban ng magnanakaw

Posted October 8, 2016
Ni Inna Carol L. Zambrona, YES FM Boracay

Image result for magnanakawNagpasaklolo ang isang 33-anyos na lalaki matapos luoban ng magnanakaw ang kanyang kwartong inuupahan sa Station 3, Brgy. Manoc-manoc, Boracay kaninang madaling araw.

Sumbong ng biktimang si Gerald Sularte sa Boracay PNP, alas-kwarto y medya kanina ng pumunta siya ng lababo kung saan ilang minuto umano ang nakalilipas sa pagbalik niya ng kwarto ay nawawala na ang kanyang slingbag.

Nabatid sa biktima na naglalaman ang naturang bag ng mga importanteng ID, cellphone at cash na P 8, 000.

Samantala, sinubukan umanong i-check ng biktima kung saan pumasok ang hindi nakilalang suspek subalit hindi niya ito matuntun dahil sa naka-lock naman ito bago niya iniwan.

Sa ngayon, ay patuloy ang ginagawang imbestigahan ng mga pulis ng Boracay PNP station sa lugar kung ito ba ay may CCTV camera para malaman ang pagkakakilanlan ng supek.

Friday, October 07, 2016

Accreditation sa mga Non-Government Organization sa Aklan, aprobado na

Posted October 7, 2016
Ni Inna Carol L. Zambrona, YES FM Boracay

Aprobado na sa 11th Regular Session ng SP Aklan ang accreditation sa mga Non-Government Organization (NGO’s) sa Aklan.

Sa sesyon nitong Lunes, inaprobahan ang accreditation sa ilang mga Non- Government Organization (NGO) kung saan layunin nito na mag-operate at magkaroon ng transaction sa probinsya at mapadali ang kanilang proyektong ipinapagawa.

Samantala narito ang mga sumusunod na (NGO) na inaprobahan ng mga miyembro ng 17th SP.

    1.Kalibo International Airport Transport Asociation (KIATA), Incorporated
    2.Men Opposed to Violence Against Women Everywhere (MOVE) Aklan Incorporated
    3.Rural Improvement Club of Estancia (RICE)
    4.World Vission Development Foundation Incorporated
    5.Madalag Development Cooperative (MADECO)

Kaugnay nito, isa rin sa paraan ng mga NGO ang pagpapa-acredit sa SP ay para magkaroon sila ng pondo kung saan magagamit nila ito sa kanilang mga proyekto.

Principal sa Nabas, Aklan, patay matapos maaksidente sa sinasakyang tricycle

Posted October 7, 2016
Ni Inna Carol L. Zambrona, YES FM Boracay

Image result for accidentHindi na naka-abot pa ng buhay sa ospital ang isang School Principal matapos itong tumilapon habang sakay ng tricycle sa Poblacion, Nabas, Aklan.

Ayon kay SPO4 Crispin Calsado ng Nabas PNP, sakay umano ng tricycle na minamaneho ni Jed Taniongon, 29 anyos ng Brgy. Laserna Nabas ang biktimang si Juliet Salminao ng Buenasuerte Nabas , 46-anyos Principal 1 ng Gibon Elementary School ng mabungguan ito ng truck na may karga ng mga tubig na minamaneho naman ni Reynan Saracanlao ng Sebaste Antique.

Dahil umano sa malakas na pagbangga ng truck sa tricycle ay nagpagulong-gulong ang sinasakyan ni Salminao dahilan para tumilapon ito at naipit ang kanyang katawan sa gulong ng truck kung saan natagalan pa bago ito makuha.

Agad namang dinala ang biktima sa Ibajay District Ospital subali’t idineklara itong DOA o Dead-On-Arrival ng doctor.

Samantala, ang driver naman na si Taniongon ay dinala na sa syudad ng Iloilo dahil sa kanyang natamong sugat.

Ang suspek naman ay naka-kostudiya na sa Nabas PNP at nakatakdang sampahan ng kaso.

Mga masahista sa Boracay, pina-iimbestigahan ng Sangguniang Bayan

Posted October 7, 2016
Ni Inna Carol L. Zambrona, YES FM Boracay

Image result for SB Nenet Aguirre-GrafIsa ngayon ang Spa sa Boracay na maituturing na may malaking kontibusyon pagdating sa mga turista dahil patok ito sa kanila pagdating sa pagpapamasahe.

Kaugnay nito, naging usapin itong mga masahista sa ginanap na SB session nitong Martes, may kinalaman sa  umano’y nangyari kay SB Nenet Aguirre-Graf ng ito ay nagpamasahe na naging dahilan kung bakit hindi niya maigalaw ang kanyang katawan.

Nabatid na meron umanong nagalaw ang masahista sa parte ng kanyang katawan dahilan para ito ay sumakit.

Kaya naman nais niyang ipa-abot sa mga kapwa miyembro sa Sangguniang Bayan ng Malay na kanyang i-review ang ordinansa ng masahista ng sa gayon ay hindi sila makaperwisyo ng kanilang mga customer lalong-lalo na ang mga turistang nagpapamasahe.

Aniya, dapat umanong imbestigahan ang mga masahistang ito kung sila ba ay may akreditasyon ng Department of Health (DOH) at kung paano sila tini-train bago bigyan ng permit.

Kaugnay nito, sinabi ni Vice Mayor Sualog na bago mag-renew ang massage operators ngayong taon ay kailangan munang tingnan kung ang kanilang mga masahista ay mayroong permit.

Nabatid na merong ordinansa ang DOH para sa mga massage therapist na “No License, No Permit Policy”.

Samantala, itong usapin ay ini-refer na sa dalawang komite na pinamumunuan ni SB Natalie Paderes sa Committee on Health and Sanitation at SB Jupiter Gallenero sa Committee on Ordinance.

24-anyos na lalaki kulong, matapos tangkaing saksakin ang therapist

Posted October 7, 2016
Ni Inna Carol L. Zambrona, YES FM Boracay

Image result for kulong sa pananaksakHuli sa tangkang pananaksak ang isang 24-anyos na lalaki sa isang Spa sa Sation 1, Barangay Balabag, Boracay kahapon ng hapon.

Base sa blotter report ng Boracay PNP, kinilala ang biktima na si Justin Aguinido 21-anyos, isang Therapist sa naturang Spa.

Ayon sa biktima, nagwawalis ito sa labas ng Spa ng nilapitan siya ng suspek na kinilalang si Mark Christian Gara ng Sablayan, Mindoro Occidental.

Nasa ilalim umano ito ng nakalalasing na inumin, kung saan tinapik siya nito at tinangkang saksakin ng kanyang hawak na kutsilyo.

Dahil umano sa hawak ng suspek na kutsilyo ay itinulak ito ng biktima at mabilis na pumasok sa loob ng Spa.

Ngunit, kahit nasa loob na si Aguinido ay hinabol parin ito ng suspek at gusto talaga nitong saksakin ang biktima sa hindi pa malamang dahilan.

Kaugnay nito, inawat naman ng may-ari ng Spa ang nangyaring kaguluhan at agad namang nahuli ang suspek ng mga rumespondeng pulis.

Samantala, ang suspek ay pansamantalang naka-kulong sa Boracay PNP station.

Thursday, October 06, 2016

Habal-habal humingi ng accreditation sa LGU-Malay

Posted October 6, 2016
Ni Alan Palma Sr., YES FM Boracay

Dalawang grupo ngayon ng mga namamasada ng single-motorbike ang pormal na humingi ng accreditation sa Sangguinang Bayan ng Malay sa isinagawang 14th Regular Session.

Ayon kay SB Member Dante Pagsuguiron ang isang grupo ay binubuo ng mahigit sa tatlong-daang  ng habal-habal drivers at walumpo naman sa isang grupo.

Sa deliberation ng mga konsehal, pumabor si SB Member Fromy Bautista na i-legalize ang pamamasada ng mga single-motorbike dahil may mga area umano sa isla na hindi nasi-serbisyuhan ng mga tricycle at e-trike.

Image result for accreditationDagdag pa ni Bautista, i-regulate lang ang mga habal-habal at huwag payagan na dumaan sa main road para hindi maka-dagdag sa traffic at para hindi makadulot nang ano mang disgrasya.

Sa kabilang banda, kumabig naman si SB Member Jupiter Gallenero na hindi raw ito nararapat dahil ipinagbabawal ito ng batas at sa halip ay kausapin na lamang umano ang BLTMPC at hikayatin na bumiyahe ang mga traysikel na walang schedule sa color coding para maghatid ng mga pasahero sa mga area na hindi nasi-serbisyuhan ng traysikel.

Ang usapin na ito ay ini-refer naman ni Vice Mayor Abram Sualog sa tatlong komite na kinabibilangan ng Committee on Tourism, Committee on Transportation, and Committee of Public Works and Utility.

15-anyos na dalagita, tinapon sa palayan matapos umano pinag-samantalahan

Posted October 6, 2016
Ni Inna Carol L. Zambrona, YES FM Boracay

Image result for Women and Children Protection Desk (WCPD)Hinang-hina ng makita ang isang 15-anyos na dalagita matapos itong itinapon sa palayan sa Brgy. Jugas, New Washington, Aklan.

Ayon umano kay Totong Balyer, residenteng nakakita na siya ring nagreport sa mga pulis, nakita niya umano ang biktima na binusalan ang bibig at nakagapos ang mga kamay nito kung saan wala sa ayos ang suot nitong damit at nakababa ang kanyang pantalon at underwear.

Ayon naman kay Women and Children Protection Desk (WCPD) SPO2 Zoila Hilario ng New Washington PNP, agad na ni-respondehan ng kanilang himpilan ang lugar at dito nga gumulantang sa kanila ang dalagita na hindi makapagsalita dahil sa hinang-hina ito.

Sa inisyal umano na imbestigasyon ni Hilario sa biktima, sinabi nito na meron umanong naka-motorsiklo na dalawang lalaki na kumuha sa kanya kung saan may tinakip na panyo sa kanyang ilong dahilan para mawalan ito ng malay.

Nabatid, na wala paring maalala ang biktima kung ano ang ginawa sa kanya ng mga hindi nakilalang suspek matapos ang pangyayari.

Samantala, dinala na ang biktima sa ospital para ipasuri kung ito ba ay pinagsamantalahan.

Kaugnay nito, nagpapatuloy ang imbestigasyon ng Women and Children Protection Desk (WCPD) para sa pagkakakilanlan ng respunsableng suspek na walang awang gumawa nito sa menor-de-edad na dalagita.

Pag-ban ng Flyfish sa mga Sea Sports Activity sa Boracay, sumalang na sa Committee Hearing

Posted October 6, 2016
Ni Inna Carol l. Zambrona, YES FM Boracay

Image result for fly fishIpinagpaliban muna ang pagban sa Flyfish sa mga Sea Sports Activity sa Boracay.

Sa ginanap na Committee Hearing ng SB Malay nitong Martes, nag-pulong ang mga may-ari ng water sports sa pangunguna ni Committee on Tourism SB Dante Pagsuguiron kung ito ba ay ipagpapatuloy ang pag-operate nito sa Boracay.

Ito umanong usapin ay napag-usapan noong 12th Regular Session kung saan nagpakita ng mga larawan si BAG Consultant Leonard Tirol tungkol sa mga aksidente na kanilang ni-respondihan dahil sa pagsakay sa Fly Fish.

Ayon kay SB Dante Pagsuguiron, paliwanag umano ng mga may-ari sa kanila kaya umano nagkakaroon ng mga aksidente dito, ito’y dahil ni-rerequest ng mga sumasakay na bilisan at taasan ang kanilang pagpapatakbo.

Kung saan ito umano ang dahilan kung bakit nagkakaroon ng disgrasya sa ibang mga sumasakay.

Kaugnay nito, binigyan ng sampung araw ang mga may-ari ng water sports activity na magkaroon ng regulasyon ang kanilang pag-operate na ito ay dapat may nakabantay o nakamonitor na kanilang operator kung saan isa pa umano sa kanilang naisip dito ay kuhanan ng Health Certificate kung sila ba ay pwedeng sumakay nito.

Samantala, kung maka-submit na ang mga ito ay magkakaroon ulit ng meeting kung ito ba ay ipagpapatuloy o hindi.

Wednesday, October 05, 2016

Improvised Explosive Device, nakitang palutang-lutang sa Balinghai Beach sa Boracay

Posted October 5, 2016
Ni Inna Carol L. Zambrona, YES FM Boracay

Credit by: SPO1 Chritopher Mendoza
Dalawa umanong Improvised Explosive Device at isang timba ang nakitang palutang-lutang sa dagat ng isang residente habang ito ay naglalakad sa dalampasigan ng Balinghai Beach Barangay Yapak, Boracay.

Dahil dito, kaagad nitong ini-report sa operatiba ng Boracay PNP ang nakita kung saan agad namang pinuntahan ng mga pulis ang lugar.

Ayon kay SPO1 Christopher Mendoza ng BTAC, ni-respondihan ng Boracay PNP, T/SGT Joel Eclar ng 21st Explosive Ordinance Disposal (EOD) Technician Task Group Boracay- Philippine Army ang lugar.

Kung saan sa kanilang pag-imbestiga dito nakita nila ang 49 na blasting caps na nakalagay sa timba habang ang ammonium nitrate naman ay nakalagay sa dalawang galon.

Samantala, nagpapatuloy naman ang ocular inspection ng Boracay PNP, Task Group Boracay-Philippine Army at Philippine Coast guard sa area kung saan nakita ang Improvised Explosive Device.

Sa ngayon, ang narekober na blasting caps at ammonium nitrate ay nasa kustodiya na ng EOD Boracay.

PNP kumasa ng dalawang buy-bust operation sa Boracay, isang suspek sugatan dahil nanlaban

Posted October 5, 2016
Ni Inna Carol L. Zambrona, YES FM Boracay

May tama ng baril ang suspek na lalaki matapos diumano nanlaban sa mga pulis habang isinasagawa ang kanilang drug-bust operation sa Sitio Bolabog, Brgy. Balabag, Boracay kagabi.

Kinilala ang suspek na si Darwin Bartolome o mas kilala bilang Darwin Barrientos, 22-anyos, isang habal-habal driver at nakatira sa nasabing lugar.

Nabatid na habang binibigay ng suspek ang dalawang plastic sachet ng pinaghihinalaang suspected shabu ay nagpakilala ang poseur buyer na siya ay pulis kung saan agad na tumakbo ang suspek papunta sa Talaga Compound.

Dahil dito, hinabol ito ng pulis at sinabihan na tumigil subali’t imbes na tumigil ay bumunot ito ng kanyang baril at pinaputukan ang pulis na hindi naman natamaan.

Dahil umano sa pagpapaputok ng suspek ay bumunot din ng baril ang pulis kung saan natamaan si Bartolome, na ngayon ay ini-refer sa ospital sa Kalibo.

Kaugnay nito, narekober pa sa suspek ang dalawang libong marked money, cal .38 na baril at apat na bala.

Sa ngayon ang suspek ay nakatakdang humarap sa kasong paglabag sa Sec 5 at Sec 11, Article II of RA 9165 sa pagbebenta ng iligal na droga at RA 10591 sa paggamit ng baril.

Isinagawa ang operasyon ng Malay PNP, Boracay PNP, Aklan Public Provincial Public Safety Company (SWAT), Maritime Group, at PDEA.

Samantala, isa namang 23-anyos na babae ang kulong sa hiwalay na buy-bust operation ng mga otoridad sa Brgy. Manoc-manoc, kanina madaling umaga.

Kinilala ang suspek na si Maribel Lubrico, 23-anyos, native ng Misayap, Cotabato at resident ng naturang lugar.
Nakuha sa posisyon ng suspek ang dalawang suspected shabu at dalawang libong buy-bust money.

Nahuli ang suspek sa isinagawang operasyon ng Malay PNP, Boracay PNP, Maritime Group, at PDEA.

Samantala, nakatakda namang sampahan ng kasong paglabag sa Section 5 Article II Republic Act 9165 o dangerous drugs act ang suspek.

Ukranian national sa Boracay, nagwala;kulong

Posted October 5, 2016
Ni Inna Carol L. Zambrona, YES FM Boracay

Image result for kulongIpina-kulong ngayon ng Security Guard sa isang Convenience store sa Station 2, Balabag, Boracay ang turistang Ukranian national matapos itong manggulo sa lugar.

Sa blotter report ng Boracay PNP, ini-reklamo ng biktima na si John Benron Tobilla, 25-anyos ang suspek na si Dan Jordan, 25-anyos itoy matapos manggulo sa tindahan sa lugar.

Nabatid na nasa ilalim ng nakakalasing na inumin ang  ng pumasok sa tindahan kung saan umupo ito sa upuan at nakatulog.

Nguni’t makalipas umano ng ilang minute, napansin ng biktim na nahulog ito sa kanyang inuupuan kung saan ng kanya nang tutulungan ang suspek ay ikinagalit naman nito dahilan at nagwala at pinaggugulo nito ang mga grocery na nasa tindahan.

Dahil dito, pinusasan ng biktima ang suspek at dinala sa Boracay PNP kung saan ito ngayon ay pansamantalang naka-kulong sa kanyang nagawang kasalanan.