YES THE BEST 911 BORACAY

Friday, November 24, 2017

DTI, patuloy na ang monitoring ng presyo para sa Noche Buena

Posted November 24, 2017
Ni Danita Jean A. Pelayo, YES THE BEST Boracay
Image result for dti logo
Patuloy na ang monitoring ng Department of Trade and Industry (DTI) para sa presyo ng Noche Buena sa nalalapit na holiday season.

Sa panayam ng himpilang ito kay DTI-Aklan Officer In Charge Ma. Carmen Iturralde, maaring bisitahin ng mga mamimili ang kanilang website na www.dti.gov.ph para makita ang mga Suggested Retail Price (SRPs) ng mga pangunahing bilihin lalo na sa pang-noche buena.

Kaugnay nito, nagbigay din ng paalala si Iturralde sa mga nais bumili ng mga christmas lights na suriin itong mabuti kung ito ba ay may Import Commodity Clearance (ICC) mark at kung ito naman ay local masusing tingnan ang Philippine Standard (PS) Certification Mark.

Itong paalala ay upang matiyak na ligtas ang mabibili at makaiwas na rin sa posibleng insidenteng dulot ng pagbili ng maling produkto.

Samantala, kung sino man umano ang magkakaroon ng hindi angkop na presyo ng bilihin para sa noche buena ay maaaring isuplong sa DTI para mabigyan ng show-cause orders ng nabanggit na ahensya.

Thursday, November 23, 2017

Tourist Arrivals sa isla ng Boracay, tumaas ng 14% sa unang 10 buwan ng taon

Posted November 23, 2017
Ni Teresa A. Iguid, YES THE BEST Boracay

Umabot sa 14% ang itinaas ng tourist arrivals sa Isla ng Boracay mula sa buwan ng Enero-Oktobre ng taong kasalukuyan.

Base sa datos na inilabas ng Aklan Provincial Tourism Office (APTO) nagpapakita na mula sa 1,466,796 tourist arrivals ng nakalipas na taon ay tumaas ito ng 1,669,751 sa parehong panahon.

Sa tala ng APTO Boracay Statistics 2016-2017 nagpapakita ng positibong pagtaas ng bilang ng mga turista kung saan ang buwan ng Abril ang may pinalkamataas na rate na umaabot sa 27%.

Samantala, magmula sa buwan ng Enero hanggang Octobre, nakalikom ng P46,526,574,162 tourism receipts mula sa overseas Filipinos, foreign visitors at domestic tourists.


Bagong head ng PENRO Aklan, pinangalanan na

Posted November 23, 2017
Ni Inna Carol L. Zambrona, YES THE BEST Boracay

May bago nang head ang Provincial Environment and Natural Resources Office (PENRO) Aklan.

Ito ay sa katauhan ni Bernabe Garnace na siya ngayong itinalagang OIC ng PENRO Aklan nito lamang Lunes Nobyembre 20 taong kasalukuyan kapalit ni Ivene Reyes na umano’y na-dismissed ng ombudsman dahil sa katiwalian.

Bago nito, nanilbihan muna bulang Community Environment and Natural Resources Officer si Garnace sa Mambusao, Capiz bago ibinigay sakanya ang bagong posisyon sa inilabas na Special Order No. 2017-422 ng Department of Environment and Natural Resources (DENR) in Western Visayas.

Kilala rin siya dahil sa naging coordinator din ito ng DENR National Greening Program sa Capiz.

Samantala, aasahang dadalo si Garnace sa nakatakdang symposium na gagawin sa Boracay sa susunod na linggo kung saan tatalakayin ang sitwasyon ng isla at usaping kalikasan.

Wednesday, November 22, 2017

No Permit to Transport and No Franchise Vehicle, hinuli sa Boracay

Posted November 22, 2017
Ni Teresa A. Iguid, YES THE BEST Boracay

Image may contain: 6 people, people standing and outdoor
Photo Credit: LGU Malay
Sa pangunguna ni Malay Municipal Transportation Head Cesar Oczon kasama ang Malay Auxiliary Police (MAP) ay nagsagawa ng operasyon sa paghuli ng  mga sasakyan  na walang PTT o Permit to Transport at mga “Colorum”.

Sa panayam ng himpilang ito kay Oczon, sinabi nitong regular umano nilang isinasagawa ang nasabing operasyon sa Boracay kung saan mayroon silang nahuhuling mga violators na di-bababa sa 20 na sasakyan kada araw.

Ayon dito, noong ika-16 ng Nobyembre mayroon silang nahuling 21 motorbikes na karamihan ay walang mga transport permits.

Dagdag pa nito, ilan din sa kanilang mga nahuli ay ang mga colorum na tricycle, mga sasakyang napaso ang permit  at ang motorsiklong may modified muffler.

Samantala nag paalala naman si Oczon sa sinumang mahuhuli na lalabag ay papatawan ng 3 days impoundment ng sasakyan at P 2,500 violation fee para sa first offence, 5 day impoundment at P 2,500 violation fee para sa second offence at 7 days impoundment, removal of side car at payment of violation fee naman para sa 3rd offence.

Sa ngayon naka impound umano ang mga nahuling sasakyan sa Materials Recovery Facilities o (MRF).

Eco Bricking at Eco Brick Training Workshops sa isla ng Boracay, isinagawa

Posted November 22, 2017
Ni Danita Jean A. Pelayo, YES THE BEST Boracay

Image may contain: 11 people, people smiling, people sitting, table and indoorIsang maka-kalikasang aktibidad ang inilunsad sa Boracay sa pamamagitan ng Eco Bricking at Eco Brick Training Workshops nitong nakalipas na araw.

Sa panayam sa Co-Founder ng I Love Boracay Movement na si Mark Cabrera, itinayo ang naturang kilusan na kasama ang mga mamamayang may malasakit sa isla para masolusyonan ang hamon sa solid waste management.

Ani Cabrera, ang hamon ay sa segregasyon at ang pagpo-proseso ng mga used plastic bottle kung saan target nito na mag-umpisa sa mga miyembro ng pamilya.

Layun din ng naturang aktibidad na ipalaganap ang alternatibong paraan  sa halip na itapon o ikalat sa paligid.

Nabatid na nagsimula ang eco-brick activity na ito nitong Linggo kung saan dinaluhan ng mga 25 partisipante mula sa Lokal na Pamahalaan ng Malay, 23 mga estudyante mula sa iba’t- ibang paaralan.

Kabilang sa mga sumailalim sa workshop ang mga Community leaders, Philippine Coast Guard, BFI, Goshen School of Technology and Humanities, Greenyard, Supervisor ng Balabag MRF, Central MRF at aasahan pa ang pagdating ng Manoc Manoc Supervisor.

Aasahan pa umano ang mga susunod na yugto ng community workshop na ito.
Pinapaabot naman ni Cabrera sa publiko na kung sino man ang gustong makibahagi na nagmamalasakit sa isla ay ikalulugod nila.

Samatala, ang mga magagawang  Eco-Brick na ito ay pagsasama-samahin bilang pangpalit sa mga Hollow Blocks o maging furnitures ng sa ganun ay mapangalaagaan ang Boracay.

Eskedyul ng mga aktibidad para sa Ati-Atihan 2018, inilabas na ng KASAFI

Posted November 22, 2017
Ni Inna Carol L. Zambrona, YES THE FM Boracay

Isang buwan at kalahati nalang bago ang 2018, inilabas na ang eskedyul ng Kalibo Sto. Niño Ati-Atihan Foundation, Inc. (KASAFI) para sa nalalapit na Ati-Atihan Festival.

Ayon kay KASAFI Chairman Albert Meñez, nasa final stage na umano ang kanilang preparasyon kung saan sa Enero 6 ay sisimulan na ang 3rd Ati-atihan Futzal Cup (Football) na susundan ng nine-day devotional novena, parish visitation ng Santo Niño at tradisyunal paeapak at Search for Mutya ng Kalibo Ati-atihan 2017 sa Enero-12.

Narito ang iba pang mga sumusunod na skedyul sa naturang event;

Enero 13 - Car Show sa Pastrana Park.

Enero 14 - Sikad Karera para sa mga mahilig sa bike at bikers rally

Enero 15 - Search for Ati-atihan Festival King, Hala Bira Ati-atihan nights,  Kalibo Ati-atihan Street Bazaar, Kaeanan sa Plaza, Aklan Ati-atihan Tourism Travel Café (Aktoa), Aklan Visual Arts Exibit, at Ati-atihan float parade.

Enero 16 - Sang Kalibo Tamboe and Street Party

Enero 17 - Pagdayaw kay Sr. Santo Niño, Dep-ed Aklan Students

Enero 18 - Sinaot sa Calle, Dep-ed Aklan Teachers,  Aklan Higante Contests

Enero 19 - Sadsad Pasaeamat kay Sr. Santo Niño , Kalibo Spectrum Invasion 2018

Enero 20 - Dawn Penitential Procession, Street Dancing Contests: Ati-atihan Tribal Big and Small, Balik-Ati, Modern Groups and Indiviual at Hornada.

Enero 21 - pag-transfer ng Santo Niño Image, Pilgrims Mass, Sadsad at Religious Procession.

Kaugnay nito, hinikayat ni Meñez ang publiko na makilahok sa week long selebration na isinasagawa tuwing ikatlong linggo sa buwan ng Enero sa Kalibo kung saan ito ang tinatawag na “Mother of All Philippine Festival”.

Reclamation sa Caticlan, muling pinuna ng SB Malay; DOTr ipapatawag

Posted November 22, 2017
Ni Inna Carol L. Zambrona, YES THE BEST Boracay

Image may contain: one or more people, people sitting and indoor
Muling pinuna sa Sangguniang Bayan ng Malay ang nagpapatuloy na development sa reclamation area sa Caticlan Jetty Port ng Aklan Provincial Government.

Nais ngayon ni Sangguniang Bayan Member Frolibar Bautista na magpasa ng resulosyon at talakayin ito sa Committee Hearing upang malaman kung ano na ang status sa 2.6 hectare na reclaimed area.

Suhestyon ni SB Jupiter Gallenero dito, dapat imbitahan ang opisina ng Department of Transportation (DOTr) upang magpaliwanag.

Ikinumpara ito ni Committee Chairman on Environment Nenette Graf ang nangyayari sa Boracay na huwag dapat basta-bastang magsagawa ng kung ano-anong straktura bagkus dapat parin aniyang mag-konsulta ito sa kinauukulan kung ano ang rules and regulation na ipinapatupad sa bayan Malay lalo na sa Boracay.

Samantala kung si Vice Mayor Abram Sualog ang tatanungin kailangan munang linawin ang naturang isyu bago gumawa ng hakbang para dito.

Sinambit pa ni Sualog na isa umano sa problema ay kulang sa enforcement ng Zoning Office na siyang pupuna sa mga kahalintulad na mga sitwasyon.

Ayon kay SB Bautista dapat maayos itong i-implementa dahil pwede umanong kasuhan kung sinuman ang lalabag base sa ordinansang ipinapatupad.

Kaugnay nito, pag-uusapan ng plenaryo ang 2.6 hectare na lawak ng proyekto  na ngayon ay on-going ang construction kabilang na ang paglagay ng daungan at mga rampa.

Thursday, November 16, 2017

Straktura ng umano’y pier na pinapatayo sa Bulabog beach, tinibag na

Posted November 16, 2017
Ni Inna Carol L. Zambrona, YES THE BEST Boracay

Tinibag na ang umano’y ipapatayo sanang pier sa bahagi ng Bulabog beach malapit sa Ati Village.

Nabatid noong isang linggo ay napansin ang konstraksyon sa lugar kung saan si Sangguniang Bayan Member Nenette Graf ang siyang pumuna sa mga  nang poste na nakabaon na sa dalampasigan.

Image may contain: sky, beach, mountain, cloud, outdoor and nature
Photo Credit SB Graf
Sa panayam kay Executive Assistant IV Rowen Aguirre nitong nakalipas na araw sa pakikipagtulungan ng MPDO o Municipal Planning Development Office, Zoning Office, Engr. Office at ng LGU-Malay pinuntahan nila ang area para magbigay ng notice of violation sa may-ari para mapahinto ang ginagawang konstruksyon.

Sa kanila namang pag-inspeksyon sa lugar ay natibag na ang mga nakatayong poste subalit wala silang matumbok kung sino at anong establisyemento ang nag-hukay doon.

 Sa kabilang banda, sa pagtatanong ng istasyong ito sa mga tao sa lugar isang tulay umano ang gagawin sa lugar kung saan dadaong ang mga yacht at sea service.

Samantala, ayon kay Aguirre pina-iimbestigahan na nila sa kinauukulang ahensya ang naturang kaso.

Kaugnay nito, sa naganap na 38 th Regular Session ng Sangguniang Bayan ng Malay pinag-usapan itong isyu ni Committee on Chairman Environment Nenette Graf na aniya nagpapakita na umano ang tao ng “total disrespect” sa kanilang mga kinauukulan dahil alam naman ng lahat na mayroong ordinansang sinusunod kaugnay nito.

Binanggit pa ni Graf na may problema umano ang LGU sa regulasyon kung saan nang kanilang tanungin kung kanino itong proyekto ay wala silang ideya kung kanino ba talaga ito.

Sa ngayon umano kanila nang inaayos itong isyu para hindi na maulit muli.

Thursday, November 09, 2017

Lalaking wanted sa kasong Sexual Assault, arestado sa Boracay

Posted November 9, 2017
Ni Inna Carol L. Zambrona, YES THE BEST Boracay

Image may contain: outdoorArestdo ang lalaking wanted sa isinagawang operasyon ng kapulisan na may kasong sexual assault sa Sitio Cabanbanan, Brgy. ManocManoc kahapon ng hapon.

Sa joint manhunt ng BTAC Intel Operatives at APPO Trackers Team, naaresto ang  suspek na kinilalang si Nicanor Flores y Sadiasa, 49-anyos, tubong Nabas, Aklan at temporaryong nakatira sa nasabi ring lugar.

Sa blotter report ng Boracay PNP, inaresto ang suspek na may warrant of arrest  na inisyu ni Hon. Bienvinido P. Barrios, Jr. Presiding Judge, RTC, 6TH Judicial Region, Branch 3, Kalibo, Aklan na may petsang September 8, 2016.

Kaugnay nito, nagkakahalaga ng P 200,000  ang inilaang piyansa para sa pansamantalang kalayaan ni Flores.

P 420-M loan ng probinsya, aprobado na

Posted November 9, 2017
Ni Inna Carol L. Zambrona, YES THE BEST Boracay

Image may contain: one or more people, people sitting, table and indoor
Photo Credit: SP-Aklan
Inaprubahan na nitong Lunes November 6,2017 sa 59th Regular Session ng Sangguniang Panlalawigan Aklan ang terms and conditions para sa P420 M na uutangin ng probinsiya sa Land Bank of the Philippines.

Inaprubahan ito ng Committee on Appropriations, Budget, Finance and Ways and Means ng Sangguniang Panlalawigan ng Aklan sa kahilingan ni Governor Florencio Miraflores.

Kabilang sa mga proyektong paglalaanan ng budget ay pagsaayos ng Aklan Training Center na may budget na P30 million, Provincial Engineer's Office 20 million, Paseo de Akean P 10 million, expansion ng Provincial Assessor’s Office P 8 million, at improvement ng ABL Sports Complex na may kabuuang budget na P 22 million.

Kabilang din sa paglalaanan ng budget ang pag-improba ng pasilidad sa Caticlan Jetty Port and Terminal na may inilaang pondo na 300 million at P 30 million naman sa pagbili ng ibat-ibang mga heavy equipment ng probinsya.

Matatandaan na noong Pebrero ay inaprubahan ang planong pag-loan ng probinsya sa LBP sa 28th Regular Session ng SP-Aklan na ayon sa isinagawang naunang committee hearing ay may kakayahan ang Aklan mangutang ng P 1.5 Billion ayon sa Land Bank of the Philippines.

Anchorage Fee sa mga dadaong na Cruise Ship sa Boracay, dapat i-implenta –Vice Mayor Sualog

Posted November 9, 2017
Ni Inna Carol L. Zambrona, YES THE BEST Boracay

Dapat umanong  i-implementa ang ordinansa na sumisingil ng anchorage fee sa mga Cruise Ship na dadaong o bibisita sa isla  ng Boracay ayon kay Vice Mayor Abram Sualog sa naganap na sesyon ng Sangguniang Bayan ng Malay kahapon.


Ang usapin ay nag-ugat sa naging Privilege Speech ng Committee on Environment Protection Chairman Nenette Graf na aniya dapat singilin ng anchorage fee itong mga cruise ship.

Para malinawan ang plenaryo, ipinatawag nila ang head ng Transportation Office, Treasurer Office at Licensing para tanungin kung ano ang kanilang ideya kaugnay sa naturang usapin at kung ang ordinansa ba ay nasusunod.

Sa salaysay ni Cezar Oczon ng Transportation Office, sa kanilang pag-uusap ng Philippine Ports Authority o PPA, ini-refer sila nito sa Memorandum Circular number 2012-122 na pinalabas ng DILG kung saan nakapaloob umano dito na ipina-suspendi sa LGU-Malay ang pagsingil sa kaparehong collection fee’s kasama na ang probinsya at barangay na pareho sa PPA dahil magiging doble ang singil sa tax.

Dahil dito, gagawa sila ulit ng sulat sa opisina ng PPA at gayundin ang agent ng mga cruise ship may kaugnayan sa gustong i-implementang ordinansa ng Malay para mas klaro sa lahat kung ano nga ba ang dapat sundin at kung saan dapat magbayad ng anchorage fee.

Wednesday, November 08, 2017

Registration para sa mga bagong botante , muling ikinasa ng Comelec

Posted November 8, 2017
Ni Danita Jean A. Pelayo, YES THE BEST Boracay

Muling ikinasa ng COMELEC Office sa Bayan ng Malay ang registration para sa mga bagong botante para ng Barangay at SK Election para sa susunod na taon.

Sa panayam ng himpilang ito kay Malay Comelec Officer Elma Cahilig, sa kasalukuyan  patuloy ang pagbisita ng mga bagong botante, mga nagpa-reactivate at nag-proseso sa pagpalit ng kanilang apelyido.

Nabatid na awtomatikong magiging regular voters at hindi na kinakailangang magparehistrong muli ang mga nasa 18-anyos  bago ang May 14 ng susunod na taon na nagpa-rehistro sa SK noon.

Kaugnay nito ang nasa edad 15-anyos o bago ang araw ng eleksyon ay maari ng magpa-rehistro para sa Katipunan ng mga Kabataan (KK) kung saan ang mga kabataang nakapagparehistro na nitong nakaraang Abril ay hindi na kinakailangang magparehistrong muli.

Habilin ng COMELEC na kailangan magdala ng ID ang mga magpapa-rehistro bilang Regular Voter habang Certificate of Live Birth o Baptismal Certicate naman para sa mga lalahok sa Katipunan ng Kabataan election.

Samantala, bukas ang opisina ng Comelec- Malay hanggang sa ika- 30 ng Nobyembre bilang pinakahuling araw ng rehistrasyon kung pagbabasehan ang COMELEC Resolution No.10214.

Ms World Dream, dadaong sa Boracay ngayong buwan

Posted November 8, 2017
Ni Danita Jean A. Pelayo, YES THE BEST Boracay

Image result for Ms World Dream
Inaasahan ang pagbisita ng MS World Dream sa isla ng Boracay ngayong buwan ng Nobyembre.

Sa ginanap na pulong sa Caticlan Jetty Port, inihahanda na ang mga preparasyon at seguridad na ilalatag para sa maiden call ng nabanggit na cruise ship sa darating na ika-22 ng Nobyembre.

Nabatid na ito ang ika-11 na barkong bibisita sa isla ngayong taon lulan ang nasa 4,000 na mga pasahero at 1,900 na mga crew na ganap na darating ng alas-syete y medya ng umaga at magtatagal hanggang alas- kwatro y medya ng hapon.

Dahil sa ito ang kauna-unahang pagbisita ng naturang barko, isasagawa rito ang maikling programa at exchange of plaques.

Kaugnay nito ang MS Millenium naman ay bibisitang muli sa isla ng Boracay sa ikalawang pagkakataon sa taong ito sa Nobyembre 21.

Samantala, limang barko pa ang hihintayin para mabuo ang labing-anim na bilang ng mga dadaong na cruise ship sa isla bago magtapos ang taon.

Dalawang magkahiwalay na kaso ng pagnanakaw, inireklamo sa Boracay PNP

Posted November 8, 2017
Ni Inna Carol L. Zambrona, YES THE BEST Boracay

Himas-rehas ngayon ang isang construction worker matapos itong maaktuhang nagnakaw ng underwear sa Sitio Angol kagabi.

Ayon sa kwento ni Jovani Española sa Boracay PNP, nakita niya ang suspek na kinilalang si Ferdinand Unabia, 33-anyos ng Cebu City na nasa loob na ito ng kanilang compound at tila mayroon itong sinisilip sa bintana ng kanilang boarding house dahilan para kaniya itong sitahin.

Dito, laking gulat ng nagrereklamo ng makita nito na hawak-hawak na ng suspek ang underwear ng kanyang anak at ng isa pang boarder kung saan agad itong tumawag ng pulis para madakip.

Samantala, sa panayam kay Unabia wala umano siyang maalala sa pangyayari dahil lasing siya ng magawa niya ang insedente at kung bakit kinuha niya ang underwear.

Sa isa pang kaso, isang pintor naman ang inaresto dahil din sa kasong pagnanakaw sa loob ng kanyang pinag-tatrabahuhang hotel sa Balabag.

Kinilala ang biktima na si April Joy Sentos, 25-anyos ng Iloilo at pansamantalang nakatira sa Brgy. ManocManoc habang ang suspek ay si Sherwin Abalino, 34-anyos, taga-Kalibo at pansamantalang nakatira sa Balabag.

Sa salaysay ng biktima sa mga pulis, nilagay niya ang kanyang wallet sa drawer sa loob ng kanilang Pantry Area subalit ng kanya itong balikan ay nawawala na ito sa loob ng drawer.

Dali-dali namang humingi ng tulong si Sentos sa Security Guard na naka-duty at ini-report ito sa Security Manager kung saan ng kanilang tignan ang CCTV footage, nakita nila dito na tanging ang suspek lang ang pumasok sa area.

Dahil sa pangyayari, ipinatawag nila si Abalino at dito inako niya na siya ang kumuha ng wallet na naglalaman ng pera na mahigit P 3, 000.

Ayon sa suspek hindi siya lasing ng kinuha niya ang wallet ni Sentos ngunit iginiit nito na hindi niya sinasadya na nakawin ang naturang wallet.

Pansamantalang nakakulong sa lock-up cell ng Boracay PNP ang suspek.

PSUPT Manongdo, bagong miyembro ng Boracay Joint Task Force

Posted November 8, 2017
Ni Inna Carol L. Zambrona, YES THE BEST Boracay

Itinalaga ngayon ng Police Regional Office – 6 para mangasiwa sa Peace and Order Division ng Boracay Joint Task Force si PSUPT Ryan Manongdo.

Sa panayam sa Boracay Good News, prayoridad ni Manongdo ang pagtaas sa standard ng paninilbihan ng kapulisan sa mga turista lalo na sa pakikipagharap sa mga ito dahil isa umanong pribilehiyo ang manilbihan sa Boracay.

Aniya, mahalaga ang tamang pakikitungo at pag-uugali dahil hindi biro ang trabaho ng mga pulis sa isla.

Dagdag pa ni Manongdo, nais niyang protektahan ang imahe ng isla lalo na sa mga turistang nagbabakasyon.

Sa kwento ni BTAC Chief Mark Gesulga, sikreto daw na umiikot si Manongdo na nakasuot  ng sibilyan para masubaybayan kung ano ang sitwasyon sa Boracay at para makita nito kung paano mag-trabaho ang mga pulis sa beachline.

Samantala, layunin din ni Manongdo na walang ibang sasabihin ang turista pag-umuwi ng kanilang lugar kundi maganda ang isla at maganda ang kanilang karanasan sa pagbakasyon dito.

Si Manongdo ay kabilang sa mga naging awardee ng PNP bilang Most Outstanding Police of 2016.

Laborer, sinaksak-patay ng katrabahong steel man

Posted November 8, 2017
Ni Inna Carol L. Zambrona, YES THE BEST Boracay

Image result for Sinaksak-pataySinaksak-patay ang isang trabahador ng kanyang kasamahan na steel man matapos ang hindi pagkaka-intindahan sa kanilang barracks sa Sitio Lapus-lapus, Brgy. Balabag, Boracay.

Sa blotter entry ng Boracay PNP, kinilala ang biktima na si Rodel Villamor, 42-anyos, tubong Tablas, Romblon habang ang suspek ay si Eldy Abenasa, 39-anyos ng San Fernando Masbate.

Ayon sa i-denitalye ng witness na katrabaho rin ng dalawa, nag-iinuman umano sila ng biktima at dalawa pang kasamahan sa kanilang barracks ng bigla nalang pumunta itong suspek at dito na nagkaroon ng komprontasyon ang dalawa.

Salaysay pa ng witness na sinabihan ng suspek si Villamor bago ito umalis na hihintayin niya ito sa labas ng barracks.

Nabatid na matapos ang kanilang inuman ay iniwan ng biktima ang witness na kumakain ngunit ilang minuto ang nakalipas narinig nitong humingi na ito ng saklolo at sinabing nasaksak ito.

Dahil dito, pinuntahan ng witness ang biktima at dito niya nakita na may tama ng saksak sa dibdib si Villaflor.
Agad na dinala nito ang biktima sa isang clinic subalit makalipas ng ilang minuto ideneklara itong wala ng buhay ng doktor na sumuri dito.

Ang bangkay nito ay dinala na sa Prado Funeral sa bayan ng Malay habang ang suspek ay na-arestado ng Boracay PNP.

Negosyante ng isda na binaril nitong Sabado, patuloy na ini-imbestigahan ng Malay PNP

Posted November 8, 2017
Ni Inna Carol L. Zambrona, YES THE BEST Boracay

Patuloy ang ginagawang imbestigasyon ng Malay PNP sa nangyaring pamamaril sa negosyante ng isda nitong Sabado ng gabi sa Caticlan, Malay.

Kinilala ang nabaril na biktima na si Raul Daguno Jr., 46-anyos ng nasabi ring lugar.

Ayon kay PO3 Nanty Briones ng Malay PNP, kasalukuyan ngayong ginagamot ang biktima sa Provincial Hospital dahil sa natamo nitong tama ng baril.

Ani Briones, hindi pa nila makuhaan ng impormasyon ang biktima dahil hindi pa ito makapagsalita subalit tiniyak ng kapulisan na gagawin nila ang lahat para ma-identify kung sino ang nasa likod ng pamamaril.

Nabatid kase habang papauwi itong si Daguno ay bigla itong binaril sa kanyang kaliwang parte ng likod na tumagos sa kanyang tiyan ng hindi nakilalang suspek kung saan dinala rin nito mismo ang sarili sa Malay Baptist Hospital kahit na ito ay sugatan.

Samantala, sa naging pahayag ng biktima sa mga pulis bago ito inilipat sa Kalibo, wala umano siyang kaaway at wala itong ideya kung sino ang may lakas ng loob na siya ay barilin.

20 million na budget para sa road construction sa Boracay, nasa bidding na

Posted November 8, 2017
Ni Inna Carol L. Zambrona, YES THE BEST Boracay
Image result for road construction 
Nasa bidding na ang 20 million budget para sa gagawing road construction sa isla ng Boracay.

Ito ang sinabi ni Engr. Murielle Macavinta ng Provincial Engineer Office o PEO matapos siyang makapanayam ng himpilang ito.

Aniya, pino-proseso na nila ang bidding para sa pagsasa-ayos ng mga lubak at baku-bakong kalsadahin lalo na sa mainroad dito sa isla at upang maresolba na ang problema na kinakaharap ng mga motorista at mga Boracaynon.

Kapansin-pansin na kulang sa maintenance ang kalsada at walang asphalt overlay na minsan ay binabaha pa dahilan para takaw disgrasya sa mga dumadaan.

Kaugnay naman sa paglatag at konstruksyon ng sewer pipeline ng mga water utilities sa kalsada , sinabi niya na binigyan nila ito ng pahintulot para sa kanilang expansion o proyekto pero dapat din nila itong sa orihinal na kondisyon.

Habang nagpapatuloy ang BIWC sa expansion ng kanilang sewer line, nag-umpisa na rin ang Boracay Tubi Systems Inc. ng kanilang excavation at pipe laying sa ManocManoc.

Ayon pa sa PEO, inaasahan na masisimulan na ang road construction sa 1st quarter ng taong 2018.

Kung maalala, naging malaking hamon sa pag-usbong ng Boracay ang kakulangan sa imprastraktura dahil na rin sa hindi mapigilang pagdami ng tao at pagpasok ng mga malalaking investor.

Thursday, November 02, 2017

Malaysian National, nabiktima ng magnanakaw sa dalampasigan ng Boracay

Posted November 2, 2017
Ni Inna Carol L. Zambrona, YES THE BEST Boracay

Image result for theftLabis ang pagkadismaya ng isang babaeng Malaysian National na dumulog sa Boracay PNP matapos itong pagnakawan habang siya ay naka-upo sa buhangin sa harap ng kanyang tinutuluyang hotel sa Brgy. Balabag, Boracay.

Ayon sa biktimang si Nor Asikin Binti Ghazali, 30-anyos, alas- dyes kagabi habang naka-upo siya sa dalampasigan inilagay niya ang kanyang bag na naglalaman ng Passport, ID, at cash na P 4, 000 sa buhangin.

Subalit makalipas ng ilang minuto napansin ng biktima na nawawala na ang kanyang bag na inilagay niya sa kanyang gilid.

Sa pagsisiyasat ng mga kapulisan isang witness na 15-anyos ang nakakita sa pangyayari at sinabi nito na nakita niya ang isang lalaki na may edad 14-anyos hanggang 15-anyos na kumuha sa bag ng biktima kung saan sinubukan niya itong sundan papuntang E’mall subalit hindi niya naabutan ang nasabing magnanakaw.

Samantala, patuloy ang isinasagawang follow – up operation ng Boracay PNP sa naturang kaso.

Boracay Generally Peaceful ang pagdiriwang ng Undas 2017- Gesulga

Posted November 2, 2017
Ni Teresa A. Iguid, YES THE BEST Boracay

Image may contain: 4 people, tree and outdoorNaging generally peaceful ang selebrasyon ng undas sa Isla ng Boracay ngayong taong 2017 ayon kay Acting Chief PSI Jose Mark Anthony Gesulga.

Pahayag ni  Gesulga, may nakawan umanong nangyari sa beach front kung saan isang turista na kasalukuyang  sa Isla ang naging biktima nito.

Ngunit maliban umano dito ay naging maayos naman at matiwasay ang sitwasyon partikular sa dalawang sementeryo sa Sinagpa at ManocManoc.

Bago nito, nailatag na ang plano sa seguridad katuwang ang Boracay Joint Task Force at mga force multipliers para tumulong sa trapiko at pagbabantay sa paligid ng mga sementeryo.

Samantala magpapatuloy naman ang operasyon ng mga myembro ng kapulisan at iba pang mga law enforcers hanggang bukas, November 3 ng taong kasalukuyan.

Mga residente ini-rereklamo ang masangsang na amoy sa Sitio Lugutan Drainage Outfall

Posted November 2, 2017
Ni Inna Carol L. Zambrona, YES THE BEST Boracay


Image may contain: shoes, outdoor, water and nature
Labis ang pagkadismaya ng mga residente sa area ng Sitio Lugutan Brgy, ManocManoc dahil sa masangsang na amoy na kanilang nalalanghap na dumadaloy sa outfall sa lugar.

Ayon sa isang residente, gusto niyang ipaalam sa Lokal na Pamahalaan ng Malay na sila ay napeperwesyo na dahil sa hindi magandang amoy na kanilalang nararanasan.

Nais nitong  sa mga kinauukulang ahensya na may koneksyon sa drainage system na kung maari ay bigyan nila ito ng pansin at aksyon ang problemang kanilang kinakaharap.

Ayon sa isang residente malapit doon, pagtuunan dapat ito ng pansin lalo at kalusugan ng mga naninirahan malapit sa lugar ang maaring ma-apektuhan.

Kaugnay nito, nakikipagtulungan ang ibat-ibang ahensya sa Lokal na Pamahalaan ng Malay para maresolba ang problema sa drainage system ng isla.

Kung maalala, matagal ng suliranin ang drainage sa nabanggit na lugar kung saan dito lumalabas ang maruming tubig dulot ng iresponsableng pagtatapon ng waste water at hindi pag-konekta sa sewer line.

MDRRMO-Malay, ikinasa ang blood letting activity sa Nov. 6

Posted November 2, 2017
Ni Inna Carol L. Zambrona, YES THE BEST Boracay

Image result for blood letting activityIkinasa ng Municipal Disaster Risk Reduction Management Office (MDRRMO) Malay ang kanilang blood letting activity sa darating na Nobyembre 6 taong kasalukuyan.

Hinikayat ng MDRRMO Malay ang mga residente at empleyado ng ibat-ibang establisyemento sa Boracay na maki-isa at maging bahagi sa kanilang gagawing aktibidad.

Nabatid na bago isagawa ang blood letting activity kinakailangan munang suriin ang mga mag-dodonate kung sila ba ay pasado o hindi.

Kaugnay nito pinaalalahanan ang mga magdo-donate na bawal mag donate ng dugo ang mga intake sa puso, nakainom ng alak, walang sapat na tulog, may maintenance na gamot, at may sipon o ubo.

Samantala, katuwang sa nasabing aktibidad ang Philippine Red Cross (PRC) Kalibo Chapter sa pakikipagtulungan din ng iba pang Government Agency sa Boracay.

Ang bloodletting activity ay magsisimula ng alas-nuebe ng umaga hanggang alas-dos ng hapon sa City Mall Boracay.

Layunin ng aktibidad na makalikom ng dugo para sa mga pasyenteng nangagailangan nito.